《2026香港小姐競選》即將進入最後衝刺階段，12位候選佳麗全力以赴備戰。然而，6號佳麗盧蔚晴日前卻在社交平台 Threads 上突發「深夜急救帖」，寫道：「急！聽日香港小姐要拍講三個笑話，我完全諗唔到。」帖文一出，隨即引起大量網民熱烈討論。大家除了紛紛留言提供各類笑話外，亦有醒目網民指出，此舉等同直接將節目尚未公開的「講笑話」環節提前曝光，場面尷尬。

12佳麗現身記者會 盧蔚晴大方回應

《2026香港小姐競選》今日（24/8）於尖沙咀舉行記者會，12位候選佳麗身穿華服華麗亮相。早前因「劇透事件」成為焦點的6號盧蔚晴，在接受《香港01》訪問時表現得十分大方，並親自回應有否被公司照肺。

被問到深夜急救一事，有否被公司照肺？盧蔚晴展現幽默本色：「咳咳⋯唔好意思，我唔係好舒服。哈哈，不過公司就真係冇照我肺喎，因為太錫我哋啦。（唔係太錫你哋，係太錫你！）其實公司都好錫我哋12位。哈哈（下次仲敢唔敢深夜求救爆響口？）下次唔敢啦。」

笑談備戰心聲 坦言決賽最緊要「唔好跌親」

除了劇透插曲外，談到即將到來的決賽，盧蔚晴坦言12位佳麗經過兩個月來的訓練，大家感情都非常好，彼此都有很大進步。問到穿超高跟鞋會否擔心失手，她笑言：「其實高跟鞋已經適應咗好多，最緊要決賽當日唔好跌親就冇問題啦！」