真·女神轉身｜余德丞被指借機自肥抽水識女仔：網民話好憎我

余德丞（Dickson)周三（17/11）現身電視城出席無綫台慶劇《十月初五的月光》宣傳造勢活動。對於自己有份度橋主持的J2節目《真·女神轉身》首播出街後，隨即引起網上熱話，有網民直指他度橋與女神貼身互動自肥抽水，而且借節目之名溝女。Dickson就此事接受《香港01》訪問時說笑：「哈哈！你而家見到我係咪好憎我？哈哈！其實我都有收到佢哋啲男粉絲都話好憎我，仲話我可以同啲靚女拍節目。咁我都會同佢哋講，其實都係節目效果嚟啫。但都好彩，原來都有女粉絲都會呷醋我同其他人。咁證明男女粉絲都有睇咁都開心。」

對於被指自肥借機溝女，Dickson笑言：「講真我有問佢哋攞電話㗎，係因為工作需要，咁先能夠溝通得徹底，因為你要明白始終我哋都要埋牙，我嘅意思係埋身接觸，哈哈！咁所以都要講定。加上我哋睇相同出嚟見真人可能會好唔同，咁所以我哋要約見面傾吓偈。（真人同啲相有冇距離？）肯定有距離啦，真人靚好多！真人真係好靚，係呀，係呀！如果大家再追睇嚟去，就會知邊個真正係識女仔嘅高手，我真係甘拜下風。」