【有樓萬事足】23歲男靠父幹買450萬樓　借8成半按揭：我自己供緊

無綫話題節目《有樓萬事足》今晚來到第三集，講起「成功需父幹？」的話題。節目裡，有父母見仔女都未長大成人，就已經買定樓先，誇張到：「仔一層，女一層。」第一個反應就覺得有冇咁有錢？第二個反應就可能葡萄他的仔女。事實上，節目裡有個「父幹」例子，就是23歲年輕人Ernest，現與父母住於南區私樓。2015年，在他21歲之年，在父親的幫忙之下，Ernest還在讀書的時候，成功以八成半按揭購入450萬、位於薄扶林的私樓，現時該單位用來收租。片段有一句講到：「聽到450萬，就即刻拎支票出嚟落訂。」仲話：「450萬已經好平啦喎。」雖然是剪接效果，就算不是100％父幹，其實都嬴晒、過得輕鬆啦！

記者致電過Ernest，他就澄清整件事的經過，指自己並不是100％靠父蔭：「其實我爸爸之前係反對㗎，因為佢承受唔起樓市會跌，經過大家一番討論之後，覺得一家人都承受得起，就說服到我爸爸，佢就幫我出啲錢咁，買咗個單位。」正當以為Ernest有父幹幫忙，直接full pay，他笑言：「而家冇人會full pay㗎啦。」而Ernest最開心的是，現時樓價高企，都能夠搵到一個筍盤：「睇單位見到有個凶宅都差唔多500萬，然後見到有單位價錢仲低過凶宅，真係覺得好好彩。」買了層樓，現時Ernest就用來收租，又希望父母退休後，都有錢洗吓。問到如果將來結婚，會否搬入去住？「咁又冇諗，不過我坐喺嗰個單位都覺得係正嘅，都想入去住嘅。」

提到時下年輕人埋怨冇錢買樓，Ernest就有一番見解：「雖然而家呢個時代，多咗好多物質，又有好多娛樂，年輕人就話儲唔到錢；但我父母嗰一代，都係一樣會有娛樂，但都可以儲到錢買樓。仲有就算我自己都有樓，而家都一樣要自己畀錢供緊，所以都想同大家講只要努力，生活節儉啲，唔好有咁大花費，咁就唔會呻話冇錢買樓啦。」對於時下年輕人鐘意周圍去旅行，Ernest都話同意劉鳴煒講過，「如果想買樓，一年去少幾次日本」，「只不過佢（劉鳴煒）講完俾人鬧，係因為佢有錢。」而Ernest向來都甚少去旅行，沒有額外花費。

不過Ernest就話，人生唔一定要有樓，「如果追夢同買樓之間，就要衡量下。追夢你有talent，自然就會有人畀資源你去追夢；但好似我呢啲唔係好標青嘅，就不如穩穩陣陣買層樓，我係會咁樣睇，唔會話追夢係嘥氣囉。」至於自己受訪片段今晚出街，怕不怕自己以有「父幹」上車的身分，去鼓勵儲不到錢的年青人，會被人狠批？Ernest就話：「我都嘗試以正面嘅方法去講，要妒忌都冇辦法，明白嘅人自然會明白自己。」