鬼妹仔香格拉都抽霆鋒水　廣東話教整日式叉燒飯：都唔係玩佢

謝霆鋒主持的內地節目《十二道鋒味》，在烹調過程中，由頭chok到尾，尤其喜愛扮英國名廚Gordon Ramsay，但近日卻被網民踢爆他在教煮一道威靈頓牛排時，出現不少蝦碌鏡頭，令霆鋒「神廚」之名不徑而走。來自瑞士的美少女，YouTuber香格拉，受到霆鋒超凡廚藝啟發，旋即拍了一段教煮「日式叉燒飯」的影片，抽盡霆鋒水，讓人笑破肚皮。

片中的香格拉，學足霆鋒功架，尤其是在磨刀技巧方面，她用餐刀在磨刀石上亂碰了幾下，然後認真仔細在切叉燒，畫面所見，叉燒早已預先切好，難得她的樣子還相當專注，充滿喜劇效果，不問可知是模仿霆鋒烹調時的一舉一動。其後香格拉取出白飯以手握成壽司飯的形狀，再逐片叉燒放置在白飯上，繼而在頂端放上薑蓉，「日式叉燒飯」即大功告成。忙了半天，當然要擺返個靚靚甫士，跟霆鋒鬥chok啦。

短片出街後，雖然獲得不少網民俾Like，亦有人指她抽霆鋒水，香格拉接受《香港01》記者訪問，她表示確是受到霆鋒的煮食片段啟發，「睇到謝霆鋒嘅片之後，我覺得我可以拍搞笑嘅影片囉。(怕不怕霆鋒的粉絲不高興？)我唔驚呀，本身我拍片都唔係玩佢，只係覺得有個機會俾我拍自己搞笑嘅影片。第一次見到謝霆鋒嘅影片，我覺得冇乜特別，都係煮嘢食咁囉。跟住我同朋友講開，又睇網上啲人講嘅嘢，先明白啲人點解覺得係有搞笑。」

來自瑞士的美少女香格拉，擁有西班牙及巴西血統，成為YouTuber後，一直在網上分享自己的日常生活，在她個人Instagram內更有不少仙氣靚相，成為宅男女神。不過女神被問到平日會煮甚麼東西給男友品嚐，她笑說：「冇呀，因為我冇男朋友。不過我本身都識煮嘢食，最叻煮日本菜。」但問到她最擅長的菜式，她說是日文菜式，不懂用廣東話表達。問到她識煮嘢食是否會加分，她表示「即係更加好？(多啲人鍾意咁解)可能個女仔唔識煮嘢食，但識得其他，可以balance返囉，但識煮梗係好啲啦。」香格拉是否真的懂得烹調，相信九成九的男仔也不太關心，但女神話自己冇男朋友喎，「飛雲，機會嚟啦！」。