【不懂撒嬌的女人．劇透慎入】唐詩詠為愛出走　王浩信喊到癲　

上次都有略略講到唐詩詠與王浩信會是Sad爆的一對，明明可以一齊去影婚紗相，點解影影下仲喊晒咁口，之後仲要玩失蹤？原來有婚姻恐懼症的王浩信終於突破關口向唐詩詠求婚，並由台妹張瑋純傳話，唐詩詠都仲可以坐定粒六，兼FF一下婚禮一定會搞得好浪漫之類。只不過王浩信講出口求婚啫，唔代表佢內心堅係可以100％Ready要做老襯，而影結婚相的時候，王浩信身體出現反應，起晒紅疹，一睇就知未克服到恐懼啦，最後都係影唔成。後來唐詩詠突然收到order要台南公幹，Saving繼續挽救這段關係，再一次自彈自唱《陪著你走》，還帶了唐詩詠夢想想穿的婚紗，讓女方感動流淚，似乎有得救。

其後Saving再乘勢而上，向唐詩詠宣讀愛的宣言，還讚自己好過對方的前男友以及在ICQ認識且見都未見過的初戀男友。好可惜，唐詩詠事前知道王浩信為自己付出太多，為了她更改變了自己，不想Saving為自己再犧牲的方法，就是要消失，所以趁天光之前，唐詩詠就走佬，同時想消失在Saving的世界，他可以做回自己想做的事。王浩信搵唐詩詠搵極都搵唔到，突然醒起對方提過的ICQ，一搵之下發現唐詩詠一直好想35歲之前結婚，見到咁嘅Message，王浩信喊到痴線，但只能夠一個人返香港。返到香港，又發現唐詩詠曾經出現在他的家，又要展開一番尋找唐詩詠的持久戰。接下來，王浩信就靠宣萱穿針引線，搵返唐詩詠返嚟。