【降魔的番外篇】楊潮凱黃建東怪異經歷 「小朋友」臨時客串？
撰文：鄺鈺瑩
出版：更新：
楊潮凱話自己的駕駛技巧本來麻麻，但拍完《降》劇之後，應該可以兼職做的士司機。（黃國立攝）
由SeeSeeTVB班底負責製作的網劇《降魔的番外篇-首部曲》，找來了楊潮凱、黃建東、許家傑、鄧佩儀、張曦雯等人演出，而在正劇《降魔的》擔正的馬國明亦會客串一角。於劇中扮演士司機的楊潮凱，其實是一名捉妖專家，人家用電話來收call，他就用電話來捉妖。本身對UFO、奇怪生物甚感興趣的他，今次遇上這個角色都算好玩，不過，訪問時，楊潮凱就話今次這套劇不時都有「朋友」來客串，雖則話行得正企得正無咩好怕，但有時都會嚇一跳。
完成這日《番外篇》的拍攝之後，楊潮凱隨即要趕去新劇《棟仁的時光》開工，完全是有開工無收工，休息是什麼？相信他已經忘記了 。（黃國立攝）
「有個主景連續拍了幾日，場景對開有一間好靚的別墅，後來聽司機講是庵堂，入面全是小朋友的骨灰。有日拍黃建東教我收鬼，其中一句對白是：『你按呢個掣就會雪一聲收埋嚟』，每當佢講個雪字，旁邊塊護土牆都有格格聲，如是者，他每次講都有聲音發出。第二日同收音師傾開，他問我有無聽到什麼，然後他說昨晚多了一個小朋友臨演（臨時演員）……其實都驚，不過平時拍戲途人都會望啦，啲鬼望有幾出奇。」至於另一次奇異經驗，楊潮凱就話有次拍完通宵戲後，打算小休一會再開工，於是去到公司的藝員休息室，雖然只有他一人在房內，但一閉上眼睛，即時感到有東西在他旁邊耳語。「可能太想休息，所以好嬲咁講咗粗口。結果回復寧靜。」回想這段經歷，連他自己也忍不住笑出來。
個捉妖app真係劇組人員自己編寫出來，唔係截圖。（黃國立攝）
看到許家傑花4小時化妝，黃建東話如果有男一做的話，又唔介意辛苦，仲話剝衫都肯。（黃國立攝）
黃建東乜都驚一餐
當晚也在場的黃建東，自言十分細膽兼愛疑神疑鬼，所以聽到怪聲之後嚇到不停冒汗，但為怕影響進度，加上眼見楊潮凱十分淡定，所以唯有頂硬上。劇中飾演科學家的黃建東，笑指角色跟真人同樣聰明絕頂，「第一次做男主角，而且角色很多地方可以發揮，不過最正係同潮凱合作，他很細心，會同我一齊研究對白，加上今次這套劇拍攝手法好仔細，好似電影咁拍，所以成件事都開心。」黃建東表示，近來除了忙於《降魔的番外篇》外，亦將會與林盛斌（Bob）在網絡電影合作，工作量大增令他十分高興。
既有真．降魔app，亦有真．的士，楊潮凱就係靠佢搵食（妖）。（黃國立攝）