後生仔肯屈就、儲吓錢便買到樓 汪敦敬：上車不是買Dream House
今時今日香港「樓價貴、單位細」，上車成為年輕一族的一大難題。不過，有「樓市大好友」之稱的祥益地產總裁汪敦敬，直言現時仍是年輕人買樓的大好機會，一來息口超低，二來「林鄭Plan」幫助到首期不足的上車客！
汪敦敬貴為業界人士，專營屯門、天水圍「細價樓」超過30年，看好樓市自不待言，他向記者解說自己的觀點︰「點解啲人覺得買樓難，係因為佢哋唔肯買次一等囉！」
籲做壓測盡借九成
話雖如此，樓價飆升，首期「水漲船高」，如何解決？汪老闆認為，年輕人第一次上車，好應退而求其次，「買樓好簡單，最主要是買偏遠地方、工作首幾年節省洗費！」
他形容買樓就好像坐飛機一樣，雖然坐飛機好貴，但事實上不少人仍然負擔得起廉航。至於是經濟艙、抑或平價艙，他便認為要量力而為，視乎人工多少，「拎住份人工，去銀行做壓力測試，借盡九成，盡當！」，最後便可以選擇是要市區的開放式單位，還是屯門的兩梗房單位。
他舉例指，如果以現時兩個人的入息中位數計算，根據壓力測試是可以買得到400萬至500萬的單位。「問題係願唔願意買次一等，上車唔係要買Dream House，唔係滿足你收租，唔係滿足地點需求。上車先決係買得到、供得起！」他認為只要年青人放得低，可以買居屋、買屯門樓，不少人能夠負擔，所以問題是心態怎樣調節。「你話年輕人上唔到車，係無可能。如果係，咁我做屯門樓咪無飯食？」
慳字訣︰住啊爸啊媽
另一邊廂，「慳」亦是成功的前題。汪敦敬指出，年青人今時今日無法上車，除了不願意「屈就」外，便是不願意「勒起肚皮」儲錢。「最容易買樓就係住啊爸啊媽嗰時！」若然你當時不儲錢，出來與伴侶同居，一旦生多個小孩，便會失去「靠自己的指數」，難以儲錢上車。
說得興起，他更指一些媒體「畀太多理由去『毒啲』後生仔，搞到啲人好不滿，社會好多不公」。汪敦敬稱，正正他是做「屯門樓」的生意，所以是最有資格、最有說服力講「年青人係買到樓！」他更指，現在是買樓的好時間，如果沒有上車，他相信不久將來便會想「依家咁平點解唔買呢？」。
國安法令更多人入市
撇除樓價可能回升，香港政局不穩，港區國安法惹國際反彈，又是否買樓時機？汪敦敬便引述了數據指，「林鄭PLAN」出台後，400萬以上的放盤增加了兩成多，直至國安法落實前的一周，放盤量開始減少，原因是成交大增消化了不少放盤。他歸因於國安法令到更多人入市，市民對香港的投資前景更具信心。
「有位『黃絲』帶朋友同我講佢有啲矛盾，又想買樓，但又唔係好Buy國安法，但買咗樓又有國安法支持住，我就同佢講，你覺得安全你咪買，市民買樓是好基本的權利。」所以他認為，對前景有信心的人有所增加，撇除政治立場而言，國安法的而且確對投資者是更有利。
他又指，西方政客對國安法一面倒負評，但企業卻不必然，「外國企業唔想市場安定咩」，他又認為移民未嘗不是一件好事，「有信心留喺度，無信心咪移民」，移民只是正常流動，要有大量移民才會有負面影響，笑言目前仍是「利多於弊」。汪老闆更指，不少香港人「掟煲唔掟蓋」，雖然實踐移民但卻沒有出售香港的住宅，認為他們即使因為政治等因素移民，但在投資上都為香港投下信心一票。