【生活百科】怕廁所用得耐易有水漬? 勤清潔之外要識揀塗層物料

撰文:熱評
出版:更新:

文:裝修佬 (文章標題由《香港01》編輯所擬)
我哋每日第一個同最後一個用到嘅都係廁所,香港屋企地方細,成家人都All in one,所以成日都要洗廁所。但唔通個個都想洗廁所咩!有無諗過點解五星級酒店嘅坐廁就算長期使用都咁乾淨?除咗有專人清潔之外,佢地用緊嘅都係好嘅潔具。
由於坐廁每日會接觸各種排洩物,所以陶瓷表面會加層釉,令到表面防水防污。裝修時揀一個好嘅坐廁,除咗外觀靚、沖力夠呢啲重點之外,表面嘅塗層物料亦都相當重要㗎!

廁所每日都要用,但用得耐就好易有水漬,想廁所靚靚可以點樣做呢?(GettyImages/視覺中國)

下載「香港01」App ,即睇城中熱話:https://hk01.app.link/qIZYuEC5LO​

現時市面上嘅坐廁,由款式到價錢上都好多選擇,林林總總真係好難揀。如果唔識揀嘅話,你會發現你用緊嘅坐廁除咗沖得唔夠乾淨,仲好易黐住污漬喺表面,用多一排仲好快有啡啡黃黃嘅水垢,浪費水之餘又會積聚細菌,日常打理都好花時間。

今次裝修佬會同大家解釋下市面上新式既防污同抗菌塗層。

陳年廁所難免有水漬,想避免原來識揀塗層物料都十分緊要。(GettyImages/視覺中國)

首先,點解座廁兜會啡啡黃黃嘅?

香港沖廁水大多為海水,水中會有沙石、鐵鏽等雜質,沖水時會磨損陶瓷表面,久而久之水垢呀、便便漬呀,都會卡喺裂縫到,難以清潔。好多研究都證明咗化學清潔劑嘅成份會刺激皮膚、眼睛、呼吸道,損害屋企人健康之餘仲會污染環境。

想廁所乾淨當然要勤力洗刷,但原來有廁所係有抗菌塗層㗎。(GettyImages/視覺中國)

防污陶瓷
坐廁污糟有四大原因,分別係磨損及刮傷、排洩物痕跡、長時間暴露於硬水而造成嘅水垢,以及細菌積聚。日本人最着重乾淨,所以日本就有品牌研發咗最新嘅防污陶瓷層去解決呢四大問題,仲得到Good Design Award金獎。

呢種防污陶瓷嘅超親水性能,令水流過陶瓷時,攝入陶瓷同污積之間,直接將污積托起然後沖走,用少少水就可沖走污漬。而陶層表面光滑抗刮,防止鐵鏽同其他雜質刮花,避免水垢同細菌積聚。平時簡單沖洗,唔使用到腐蝕性清潔劑,都可以令坐廁用耐咗都仲咁新淨。

想廁所用幾耐都白白淨淨,首先要知道廁所有無應用特別科技。(GettyImages/視覺中國)

抗菌塗層

依家好多大牌子嘅坐廁都會噴埋抗菌塗層,唔同牌子都有自己嘅技術,但係咪真係有用呢?我哋自己睇唔到。而某一間美國公司嘅抗菌塗層,因為係直接燒製固定係坐廁內壁,唔會因為沖多兩次水而洗走晒之餘,仲係市面上少有通過英國IMSL檢測,證明可以抑制大腸桿菌同金黃葡萄球菌滋生,用落安心好多。坐廁成家人日日用,仲會用好多年,大家買坐廁時都可以考慮唔同嘅易潔抗菌塗層。無論係邊一個品牌,定係其他塗層都好,要識得揀,先會買得啱。

其他常見問題

問 : 有水箱坐廁好定無水箱坐廁好? 
答 : 無水箱坐廁因為隱藏咗水箱喺牆身上,佔用空間少同靚好多,有機會我地詳細討論。

問 :如何選購一個坐耐少少都唔會腳麻嘅坐廁?
答 :腳痺係因為坐得耐會而壓迫到神經同血管,影響血液循環。所以唔建議大家坐太耐,10分鐘以內最好。有些坐廁會根據人體工學設計高度,坐落會較為舒適。

問 : 上水慢可以點搞?
答 : 首先上水同大廈本身水壓同流量有關係,如果唔係大廈供水問題就要睇睇坐廁上水件。因為香港來水較多雜質,長時間使用可能會令上水管,入水閥(波曲)、或者濾網積蓄污垢瘀塞,令上水變慢。

作者簡介:
裝修佬是家居裝修奇難雜症專家,希望透過文章分享及網上互動,解答巿民各式裝修難題,改變大眾對裝修方式和置家理念。

作者facebook專頁:https://www.facebook.com/hkdecoman/

(文章標題由《香港01》編輯所擬。文章純屬作者意見,不代表《香港01》立場。)