【金句集合】《前度》大好評 重溫黃子華進化論
黃子華與陳法拉的舞台劇《前度》七一開鑼，前後加場兩次，公演35場。票價最貴880元，粉絲興致不減，「撲飛」反應熱烈。《香港01》記者向「黃牛黨」查詢，原價380元票價售700元、480元售850元。《前度》首場觀眾對子華挑戰舞台劇讚不絕口，而且與過去棟篤笑一樣，《前度》劇本涉及本港多個社會議題，有演技也有深度。在子華新「金句」誕生之前，《香港01》整理「子華神」進化過程，讓大家齊齊重溫這些70、80、90後都有共鳴經典語錄。
97前的黃子華
八年前，我加入娛樂圈嘅時候，我係矢志要做一個演員嘅，我天生出嚟就係有演戲嘅細胞。我知道呢度好多人，細細個鍾意玩做戲扮吓嘢，扮吓爸爸媽媽，扮吓結婚的。我細細個同啲friends唔扮呢啲嘢，我哋一扮就扮姦夫淫婦。
1990年《娛樂圈血淚史》 ── 可是子華的個人辛酸史。在加拿大取得哲學學士學位後，子華一心想成為演員，惟事與願違，先後做過電台DJ、代課老師、編劇等。子華在首部棟篤笑中，道出這些年頭笑中有淚的經歷。
點解愛情係一件咁困難嘅事呢？ 因為好多人以為愛情係 part-time ......你唔可以話，愛？做完咪走囉！唔得㗎，愛情係咩？ 愛情係一檔生意嚟㗎。
1991年《色情家庭》 ── 子華父母早年離異，自幼思考愛情的真諦。當時30歲的子華，在這部棟篤笑中回顧幼時的家庭點滴，反思愛情、性、家庭關係的意義。子華曾在一個訪問中說過：「今次主題係性和愛本質上嘅難以掌握，點解愛係咁困難，令人成日咁困擾？」
我好細個就已經明白，無論你玩緊乜嘢，無論有幾好玩，好快就玩完，最緊要係玩完之後，跟住去邊度？
1992年《跟住去邊度？》 ── 子華在這次棟篤笑中談及過家庭、個人成長、娛樂圈的現實、政治等話題。子華曾自認是無使命感的人，為什麼會涉獵政治問題？他說：「問我點解咁做？我都唔知，呢啲係創作嘅衝動，等於我點解飲好立克，點解鍾意女人一樣。」大概每人在成長中都會迷惘。
共產黨算係咁啦，明知道中國係自己嘅家族生意，但係又知道你哋好鬼想做股東。於是就時不時搞個摸擬嘅股東大會——人大會議，等你哋去舉下手過下股東癮。但係我知道，咁樣仍然滿足唔到嗰啲民運嘅人士，佢哋一定要做真正嘅股東。
1994年《末世財神》 ── 當時社會對中國充滿戒心，擔心回歸後，內地的共產主義會影響香港的經濟發展。子華用「末世」形容這種恐懼，卻又用「財神」來描繪內地龐大市場的機遇，可謂是神來之筆。
我承認愛情是同卡拉OK咁上下……依家啲人玩愛情玩到跳樓，即係啲人唱卡拉OK唱唱下衝出去跳樓一樣！痴線咩下話？
1995年《玩無可玩》 ── 子華一改獨自表演「棟篤笑」慣例，改為與張達明共同演出，用「玩」為主題，表達港人以「玩」對待工作、愛情、理想、政治的態度。
「全港市民熱烈慶祝回歸」十隻字，有八隻字係呃人嘅，係得返「回歸」兩隻字係真嘅。
1997年《秋前算賬》 ── 香港即將回歸中國，移民潮出現，有人擔心回歸後中共會對港人「秋後算賬」。子華趕在回歸前，趁「最後機會」大談對中國大陸、香港未來的看法，當中不少金句一矢中的，被視為棟篤笑生涯中的其中一個經典。
97後的黃子華
我哋生存嘅時候，大家唔好妄想我哋會變得咁聰明，我哋一日唔死一日都傻傻地，即係可能生存根本註定咗一個「拾下拾下」嘅過程。
1999年《拾下拾下拾年棟篤笑》 ── 香港回歸，馬照跑、舞照跳，卻又適逢金融風暴。子華在棟篤笑舞台的第十個年頭，談到人生意義和死亡，金句甚多，例如：「搵食啫！犯法呀？」「男人係愛情裡面最重要嘅要求就係『新鮮』！而女人對愛情最大嘅要求就係『保鮮』！」
我覺得一個特首要連任，其實唔使搞咁多嘢，特首要連任係好簡單一件事，你就唔帶保鏢，能夠一個人行入一個大型嘅屋邨，行返出嚟，你就連任㗎啦。
2003年 《冇炭用》 ── 2003年香港SARS爆發、經濟低迷、還要抗衡23條立法，自殺率為回歸後最高。社會氣氛一片哀愁，棟篤笑名稱玩黑色幽默，因太多人變成負資產，無錢買炭，想自殺都無冇炭用。
人類嘅食物鏈，只係分為三層，最底層係無產，中層是中產，頂層冚家產。
2006年《兒童不宜》 ── 香港經濟逐漸走出03年後低谷，但當年因通縮而飽受壓榨的打工仔，並沒有分享到經濟成果，大企業則開始「賺到盡」。在這部棟篤笑中，子華針對了打工仔心態、貧富懸殊等問題，嘲弄一番。
近10年的黃子華
係咁㗎啦， 好出奇呀？ 你幾時會發覺「好出奇呀」同埋「係咁㗎啦」真正嘅威力？ 就係當有一個不幸降臨到你自己身上。
2007年《越大鑊壞快樂》 ── 子華在無綫節目《志雲飯局》中講到棟篤笑主題：「我覺得係最好嘅人生態度，越大鑊越快樂，因為人生一定會有啲大鑊嘢發生。」是苦中作樂還甘於自虐？香港現時還需要這種態度嗎？
乜嘢叫做天真？真正嘅天真，係當你相信藝人形象，就係嗰個藝人，呢個叫做天真。
2009年《嘩眾取寵》── 互聯網普及，人類生活迎來巨大轉變。子華在楝篤笑中提及，每個時代都有新事物出現，因此亦會有新問題，「我哋唔可以要啲新嘅好處唔要啲新嘅問題。只能夠鼓勵啲新嘅問題比較有幽默感」。
做人有夢想喺幾咁緊要，如果你喺冇夢想嘅話，你就會俾啲有夢想嘅迫死你！
2010年《娛樂圈血肉史2》 ── 子華當初夢想做演員，但做棟篤笑一做就做了20年。雖然做棟篤笑很成功，但對子華來說，或者更需要新挑戰。
做人無公關，食屎㗎喇！
2012年《洗燥》 ── 子華曾解釋，「洗」與「燥」兩字，一個水字部，一個火字部，相剋相沖。子華當時是否已感受到，社會中的深層次矛盾？
掟咗87枚催淚彈，梁振英走出來話：「警方係用咗適當嘅武力。」然後葉劉淑儀又出嚟講：「啲人有武器㗎，有把遮喎！」我唔知啲高官係點諗，唔係與民為善嘅咩？
2014年《唔黐線唔正常》 ── 看着香港由親切變成荒誕，子華再也笑不出來：「香港由一個我認識嘅香港，發展今日咁嘅香港，我點能夠說一個香港嘅故事，再做一次棟篤笑，喺一個咁嘅狀況，我諗好多嘢已經笑唔出，唔知點笑。」
（全文完）