【自選Playlist】無勇氣離開被竇返工? 5首與你同步過冬暖心作

撰文:彭嘉彬
出版:更新:

近日香港天氣轉冷,晚上及清晨市區氣溫跌至五六度,體感溫度更可媲美零度,街上除了風聲,就只剩「雪雪」聲。在這樣的天氣底下,對努力工作的香港人來說,起身返工真係一個大難題。日本有樂團創作了一首《不想從被窩爬出來》來道出各位上班族的心聲。香港人除了保暖外,最重要還是「阿Q精神」,在每天艱辛的返工路途上,到底聽咩歌先可以令自己打起精神?

東鐵線平日已很擠迫,若粉嶺再有大型房屋發展項目,交通配套是一大問題。 (資料圖片)

《早班火車》 – Beyond

寒冷天氣底下,應該無咩事情比搭早班火車更辛苦。一大清早未訓醒,著住臃腫嘅衣物,同一大班上班族好似沙甸魚咁逼入車廂。由冰冷嘅空氣轉入焗促嘅環境,深信唔洗多解釋大家都有苦自己知。呢個情況底下,想脫離呢個苦況,唯有合埋雙眼、戴起耳機。Beyond《早班火車》或者係一個好選擇,期望每朝都可以見到夢中情人,算得上返工路上嘅最大動力。

《幾分鐘的約會》 - 陳百強

講到搭車遇上心儀對象,又點可以唔提「地下鐵踫著她」嘅《幾分鐘的約會》,每次聽到呢首歌,都會諗起車廂中未有低頭族出現前,地鐵總是充滿著曖昧的氛圍,那種「你眼望我眼」的情景令人怦然心動,有時「迫迫哋」、衣服與衣服之間摩擦產生靜電都唔一定係壞事嚟嘅。

《終於好天氣》 - 方皓玟&RubberBand

做人最緊要有希望,不論今日經歷幾痛苦嘅狀況,只要見到曙光,就有生存落去嘅動力(好似係)。尤其喺澟冽寒風吹襲下,由起身離開被窩一刻你可能已經失去面對世事嘅勇氣,不過「Don’t Be Afraid 就算絕境想征服你」,方皓玟同RubberBand都會為你打打氣,《終於好天氣》提醒你,只要撐落去,總會等到春天的到來,By The Way,我個暖包呢?

《黃昏點唱機》 - 容祖兒&林海峰

唔知你覺唔覺,明明朝早同黃昏溫度差唔多,你都總會覺得朝早比黃昏更凍更難受。因為每朝你都知道迎面而來的除了寒風,更是排山倒海的工作,這種精神上的壓力,比起車站的長龍更為煎熬。學周星馳話齋:「信念係好緊要!」所以做人最緊要正面!聽返首容祖兒同林海峰嘅《黃昏點唱機》,幻想一下收工黃昏嘅美好景色,放鬆心情,其實時間好快過。

《夏日熱辣辣》 (metal版)

唔少戰鬥民族俄羅斯人都講過,點解佢哋唔怕凍?就好似食辣咁催眠自己話唔辣唔辣,就可以越食越辣。面對低溫都一樣,不停說服自己「天氣都唔係好凍啫」,大概就可以曬個日光浴都無問題。當然,除咗自言自語,你仲可以有一個聰明啲嘅方法,就係聽吓呢首《夏日熱辣辣》metal版,應該會有種火滾嘅感覺。