叱咤2026|古天樂為入5強出奇招 出動宣萱叉鼻黑圖爆笑拉票
《2026年叱咤樂壇流行榜頒獎典禮》將於明年1月1日舉行,現正公開接受投選叱咤樂壇我最喜愛的男、女歌手及組合最後5強,早前古天樂、宣萱憑合唱歌《無時空之戀》入到最後10強,現要由10強拉票爭取晉身最後5強。古天樂旗下頻道「古添樂」便拍影片拉票,而古生作為老闆,更順道幫宣萱及農夫加持,不過手法就非常獨特,選用對方的黑圖拉票。
影片一來,主持吳肇軒向古生表示要為佢入叱咤5強拍片,然後古生就拿出自己張型仔相拉票︰「我今年以歌手身份喺紅館開咗個演唱會,仲出埋碟,仲要!畀我入埋叱咤,如果你鍾意佢支持佢就投佢一票。仲有,如果你每畀一個Like就扣員工100蚊人工。」似乎係反擊員工私自放大假。
去到幫宣萱同農夫拉票,古生就拎出一張宣萱將兩隻手指插住鼻哥窿嘅黑圖,作另類拉票︰「呢個就宣萱,呢張相佢自己拍,完全唔關我哋事。」而去到農夫就更離譜,索性用一張真農夫相,跟陸永、C君完全冇關。最後,古生都呼籲大家Like完呢條片就去投票,大家想1月1日見到古天樂宣萱齊齊上叱咤台,就記得踴躍投票。本周五(20/11)5強投票截止。