【我哋呢班】送外賣17年 全盛時收千元貼士:轉網上外賣零頭都冇

撰文:陳芷慧
出版:更新:

當了17年外賣員電單車手的阿昌(袁劍昌)說:「我哋呢行,連一個服務員都稱唔上,我諗冇乜人睇得起。但自己唔會咁諗,都係一個職業嚟。」接近20個年頭,昌每天穿梭街道窄巷,見證港島的高樓越來越多;雪糕從紐紋新地,可以變成高聳入雲的「阿爾卑斯山」,客人變得更重視外觀,就連滿足客人對食物期望的責任,「到現在都變成係我哋嘅責任。」阿昌說。

他解說因為食物熱氣上騰,飯盒蓋容易彈開,昌會幫忙先用膠紙封好。他又會再用保鮮袋包好湯、飲料,「因為如果有一樣嘢倒瀉咗,客人會成份退走。」(鍾偉德攝)

不信餐廳包裝  自備膠紙、保鮮紙

「我自認是一個穩陣的速遞員。」昌常說自己是一個專業的外賣員,彷彿要在一個「卑微」的工作裏面,找回一點尊嚴以及對自己的認同。「喇,畀兩樣嘢你睇!」昌一臉自豪地拿出一卷膠紙和保鮮紙,說:「絕對唔好信任人哋啲包裝,自己檢查過先送比人客。就算餐廳包裝得好靚,我都唔會信,我都一定會拆開嚟睇。佢哋用嘅外賣包裝都好靚,但蓋嘅時候蓋得唔好,汁漏晒出嚟。」他解說因為食物熱氣上騰,飯盒蓋容易彈開,昌會幫忙先用膠紙封好。他又會再用保鮮袋包好湯、飲料,「因為如果有一樣嘢倒瀉咗,客人會成份退走。」他有經驗,因為從前在大型連鎖店做車手時,「在公司廚房standby,仲要幫手做吓廚房的工夫。」

睇片請點擊:【有片】網上平台包送任何食物 不顧外賣車手運送難度 

乜嘢最難運送?

「自從有了網上外賣平台,食得落肚嘅,公司都包送。」昌說。昌曾做過大型連鎖店的外賣員,從PizzaHut、麥記、KFC等等,兩年前才轉到外賣網上平台。兩者的分別,除了一份強積金,昌大嘆一句:「嘩,好唔同。以前大型連鎖店出產的食物,係專為方便外賣而設。𠵱家啲網上平台,食得落肚嘅,公司都話包送。」Pizza不會跌爛,即使出了意外,「打一個電話返公司就再做過,好簡單。」他更笑指KFC的雞件「本身都炸到爛晒,皮還皮,肉還肉,冇話送得好唔好。」

誰會想到今日的蛋糕和樓起得一樣高,雕成一個盆景卻又脆弱如危樓。「有好多食物很難運送,易爛,如整得好靚嘅布甸、雪糕、Cupcake。」公司未有考慮到食物難以運送,苦了外賣員。昌說過最難運送的是奶昔,一程車河,奶昔如洗頭水起泡,流瀉至整個車廂,後來公司決定不運送奶昔。昌說接到這些Order,不禁心裏嘀咕:「Cupcake有一半機會送到去都會爛。」從前外賣員運送的是漢堡包、Pizza,甚或一個飯盒,客人看重的是味道,「客人𠵱家對食物的期望係要靚,食物靚唔靚變成係我哋外賣員嘅責任。」

布甸變豆腐花   最難運送大坑道斜路

他曾經運送一個生日蛋糕,「我揸得好慢,大概時速十幾公里,後面架車不斷呠我,揸得慢,真係辛苦過擔泥!」運送一座外形似雪山的雪糕,客人打開盒子就變臉,「師傅,你點解唔用冰箱?」客人問。「突然之間外賣員何來找一個雪櫃?」有次他運送一個布甸,「布甸上有一粒士多啤梨,送到去個布甸都變咗豆腐花。」客人問士多啤梨在哪?他一臉無奈:「喺個底掛!」「即使我們小心駕駛,但路面不平,有一兩吋凹凸都會影響。我哋熟悉地形會留神,但有時送上半山如大坑道啲斜路,再有信心也是沒可能的事。」

從前在大型連鎖店做車手時,「在公司廚房standby,仲要幫手做吓廚房的工夫。」(資料圖片)

公司「疊單」讓外賣員經歷生死時速

去年Pizza Hut有外賣員被撞斃,事件披露外賣員被分發「速遞地圖」,運送時間限制於7至15分鐘,過了限定時間會被扣花紅,每一張單可說是生死時速。

昌說從前於Pizza Hut工作時,仍未有這個制度。然而,大型連鎖店會「疊單」,「M記試過儲埋6張單先一次過送,而且人工偏低,每張單只能賺頭3-5元,時薪不足$40」,「你返回店舖,已放著幾張單,你自然有壓力。有時這張單送遲了,下1張單又遲。當到了第3、4張單,便開始有人客的面口給你看。」從前電單車外賣員因為公司有一份勞工保險、一個頭盔,便唯有加快速度,才能多賺十元八塊。

昌說時代不同了。網上平台做法亦不一,有公司會於同一時間發多張單,造成疊單的情況,「啲行家大嘆好大壓力,超辛苦。」昌合作的公司做法不同,外賣員送單「抵壘」後,會顯示於手機應用程式,公司才會派新單,平均一小時運送5張單左右,「所以又冇要好快嘅壓力。」只是中午時段港島區交通擠塞是預料之內,昌偶爾眼見餘下路程不遠,會關掉引擎,在行人路、行人斑馬線甚至雙白線等不能調頭的地方推車。

當了17年外賣員電單車手的阿昌(袁劍昌)說:「我哋呢行,連一個服務員都稱唔上,我諗冇乜人睇得起。但自己唔會咁諗,都係一個職業嚟。」(鍾偉德攝)

再沒現金交收,也沒有貼士

「講貼士呢樣嘢,隨住年代的變化,越收越少。以前講緊一日有5、60蚊貼士,今時今日,平均$30。」網上外賣平台以信用卡交易,「冇咗啲零頭,就冇咗呢個機會賺取多幾蚊。」「以前我自己試過幾次收100蚊貼士。」有行家曾運送一個三百多元的柯打,對方給予50元歐羅作貼士;亦有人曾收過兩封共二千元的利是。

「我喺柴灣長大,柴灣人真係好冇禮貌。」曾有一位女士與友人開雀局,昌按鐘1分鐘,客人未有開門,「女客人開門後,嗰個樣好似覺得我阻住佢打麻雀咁。仲話我唔幫佢關鐵閘。」(鍾偉德攝)

承受客人嘴臉  柴灣客態度最差

「我未試過咁好彩。」昌多番提及外賣員只是一個卑微的職業,承受客人不同的嘴臉,「啲人我覺得我哋送餐的人,真係好似奴隸咁。」遊走港島區多年,見盡各階層,笑言給小費越高的客人越有禮貌,「我喺柴灣長大,柴灣人真係好冇禮貌。」曾有一位女士與友人開雀局,昌按鐘1分鐘,客人未有開門,「女客人開門後,嗰個樣好似覺得我阻住佢打麻雀咁。仲話我唔幫佢關鐵閘。」又有另一位柴灣客,認為食物質素不符合要求,昌說可回公司再重新送上,「佢話唔得,要公司派另一個同事再送過嚟,我先可以走。」

「唔同區嘅客人,唔同人種(態度)都唔同。」西方人總搭一句多謝,內地有錢人卻回以一副鄙視的臉,昌模仿著那些斜睨的眼神讓人難堪,「佢真係咁望你,冇嘢講。」

「唔開心就習慣咗,但好開心就會有。」某次送pizza 至花園道豪宅,「個仔比咗四十幾蚊小費我,我已經好滿足。我突然聽見一啲拖鞋聲,啪啪……」他還記著那兒子母親急趕跑出來的腳步聲,「她給我一封利是,我唔係在乎利是錢的多少,而是他媽媽咪同我講年初一賺多啲,出入平安。我身為一個咁卑微的外賣員,一個高貴的女士同我講啲咁窩心的說話好感動,跑出嚟同你講,嗰吓好窩心。」

下集詳述昌哥做外賣員得來「升降機恐懼症」。

請點擊下集:

外賣員日搭𨋢40次得恐懼症 「我不愛飄移㗎!」