每當提起「豬肉佬」，不期然便會聯想到捧著大肚腩切肥豬肉，或以粗聲粗氣詢問「豬肉要幾多」的畫面。不過，外表斯文、身材勻稱並時常露出陽光燦爛笑容的阿勁，可能讓你從此對「豬肉佬」的形象改觀。阿勁現時於西環一家豬肉店工作，看他切豬肉時手起刀落，待客溫和有禮，又不時與客人閒聊，建議烹調豬肉應該搭配哪些材料較好，很難想像他會放棄白領的工作轉做「豬肉切割員」。

90後的阿勁，今年只有25歲，中五畢業後曾任職手機店及珠寶店職員。然而，工作近一年半，阿勁認為自己的性格，不適合從事銷售性質的工作，適逢親友經營的凍肉鋪欲頂讓予他人，想創一番事業的阿勁，毅然辭職轉到凍肉鋪工作，再考慮是否要承接店鋪。

與街坊交流滿足感大    一次閒聊踏上「切豬肉」之路​

於凍肉鋪工作期間，阿勁才發現留在小店內，與家庭主婦以及街坊之間的真摯交流，相比起以前，更讓他獲得滿足感。「可能因為性格比較被動，做銷售員我要sell嘢，同人傾談，根本唔係同人交心，留喺街市反而唔同啲，我鐘意同師奶傾吓偈！」

工作了數月，一次與對面鋪的豬肉檔學徒閒聊，令他踏上「切豬肉」之路。「嗰時同個學徒傾偈，佢鼓勵我應該學習一門手藝，仲話最近有個豬肉切肉員嘅課程，叫我去報名，所以咪試吓囉。」

由報讀「豬肉課程」至滿師    過程披荊斬棘

要學習一門手藝，絕不容易，更可謂「過五關斬六將」。「我當時報讀僱員再培訓局與工聯會合辦的豬肉切肉員課程，有200多人面試，但只得20個名額，我入到都覺得好好彩。」

一個月的培訓課程，由切豬肉的理論以至真正落手切肉的實戰，他都涉獵得到，惟實戰經驗依然不足。「課程入面有10多日都會落手切豬肉，但一班18個人分切一隻豬，每人只分得一部分，輪流學點切，其實唔會學到好多」。

阿勁怎樣也料不到，真正的挑戰是離開書桌後才正式開始。「畢業後，透過學校介紹係元朗學師，當時每日朝早4點半開始工作，跟住師傅學習每一個拆骨、切肉的程序及步驟。每日返足10多個小時，其實真係好辛苦，亦唔係個個都頂得順。」當他處於工作適應期，卻在學師第四天，便不慎用刀斬斷了左手姆指的手筋，要暫時休養逾2個月。「應該斬斷咗半條筋，但而家郁得返係應該無事啦，有時做一樣野，總係要付出代價。」

工傷痊癒後返回工作崗位，半年後終於學滿師，能夠真正成為「豬肉切割員」，並在店鋪獨當一面。即使沒有其他人幫助，阿勁也能獨自完成拆骨切肉以及賣肉的工作，終於達成目標。阿勁十分滿意地表示：「我覺得自己都幾有天份，呢份工咁辛苦，我都頂得住。」

收入比前穩定    日薪最低1000元

成為「豬肉切割員」，不單令阿勁獲得前所未有的滿足感，亦令他現在有穩定的收入，以達成將來目標。「以前喺珠寶店擔任銷售員，底薪只有幾千元，要睇你sell到幾多，先會有多d錢，所以收入好唔穩定；做豬肉只係學師，都已經1日有600至700元，學滿師最少1日都有1000元，收入穩定好多。」

阿勁表示，對於將來的方向暫未有明確目標，「如果要我做足一世切豬肉都可以，但如果將來有家庭，可能會做啲生意囉！」

「豬肉佬」亦可以姿整    自己每日早一小時起床梳洗

對於現時行內很少年輕人願意入行，阿勁表示：「可能過往大家對做豬肉嘅印象唔係咁好，加上工作又辛苦，如果做錯嘢比師傅用粗口問候，係少不免。」

阿勁又指，不要以為從事「豬肉切割員」的人就不講究儀容及衛生，他坦言每天都會預早一小時起床梳洗。「我每日都要慢慢睇下著咩衫，整吓個頭。」

父不反對自己選擇     不怕工作影響感情生活

雖然阿勁最初入行時，衣服弄髒都會介懷，亦會在意其他人目光，惟入行一段時間已習慣了。「其實整污糟咪洗返乾淨囉，有時做嘢，都會有家庭主婦走埋嚟問我，點解咁後生要做豬肉，但我習慣咗啦！」

阿勁父親現時於內地擔任內科醫生，對於兒子的選擇，卻沒有太大反對。「佢曾經叫過我讀醫，但我話自己無興趣而且讀唔嚟，所以佢就無再比任何意見。」

阿勁現時還未有女朋友。對於愛情方面，他表示不怕因工作影響結識將來的女朋友。「呢方面隨緣啦，但鐘意我嘅話，點都會鐘意！」