建故宮博物館欠諮詢　陳淑莊批政府「怕反對唔諮詢好離地」

政府決定於西九文化區興建故宮文化博物館，其後再推公眾諮詢，收集有關「對博物館設計和營運、以及其展覽和教育活動的重點方向的意見」，但不包括「西九應否興建故宮博物館」。立法會監察西九文化區小組委員會副主席陳淑莊今日（7日）出席電台節目時，批評政府「如果怕反對意見而唔諮詢係好離地」。

陳淑莊指，自己在公眾諮詢期間，仍會提呈有關「西九應否興建故宮博物館」的意見，反問「點解（政府）唔可以問大家，西九係咪應該有故宮博物館，同埋究竟應該起喺邊度？」她又指，政府不就此作諮詢或因怕尷尬，但她認為在香港這個地方「有反對意見係正常」，批評政府因此逃避是「離地」的表現。

對於新增故宮文化博物館，陳淑莊指香港已有逾3萬平方米的文化博物館，政府應思考可否改裝現有博物館，「唔係所有嘢（博物館）都要係新嘅」，又反問「嗰度未展過啲國家級嘅嘢咩？」認為沙田文化博物館亦可展出故宮展品。

另外，陳淑莊又批評政府直接委任建築師嚴迅奇擔任設計顧問，認為雖然博物館是專門項目，但亦不應跳過諮詢。出席同一節目的香港城市設計學會副會長何文堯則指，外國博物館亦會直接委任設計顧問，舉例稱法國羅浮宮亦由時任法國總統直接委任華裔美籍設計師貝聿銘負責設計。