港鐵今日（22日）下午5時許表示，由於電力供應受阻，將軍澳綫服務暫停。不少乘客需要改成其他交通工具繼續行程，北角英皇道有大批市民等候巴士，更一度湧出馬路。及至傍晚6時許，酷熱天氣警告仍然生效，不少人等到大汗淋漓仍未能上車。

其中，剛在北角放學的博士生余先生表示，在北角放學後，本想乘搭港鐵返回寶琳，但知悉列車服務受阻後，便到地面等候690路線巴士，但一直未能上車，在行人路原地等了半小時，「出晒汗」，但他表示不趕時間，已等候多時，相信會繼續等車。

在北角上班的鄺先生，原本下班後搭港鐵，落到站內才收到故障通知，結果要轉乘巴士，「喺度企咗15分鐘，等690返將軍澳，頭先有嚟過一㗎，但滿嘅根本上唔到」。他無奈表示，不考慮坐其他交通工具，因為估計太古城一帶同樣塞車。「地鐵巴士係廢嘅，唔係都唔會上嚟啦」。

另有一名老婦人，因為619X路線巴士太逼，主動下車，向記者哀嘆：「喺原地等咗成個鐘啦」。後來一輛601巴士靠站，有警員大嗌：「呢架去觀塘，有冇去觀塘」，老婦即刻衝前大叫：「去觀塘呀」。但現場所見，每輛巴士均滿載，無法上車。

市民張小姐於太古城下班，買東西後前往乘港鐵，欲前往觀塘。晚上約7時，當列車到鰂魚涌站竹後「就唔得啦，封埋線要落車」，只好回地面等巴士繼續行程，因手持重物而感疲累。她認為安排差劣，「根本唔知個（巴士）站點係邊，個個聽到有車就衝埋去，根本冇人排隊」。

現場情況混亂，不少市民不清楚自己等候的巴士的隊尾在什麼位置，「呢度係咪排緊619架？」、「我都唔知」。另外，由於有市民走出馬路，警方其後拉上膠帶維持秩序。

由於遲遲未能上車，不少市民開始鼓譟，與維持秩序的警員不時發生出現口角，警員需高呼：「無論係邊個，都要排隊！排隊呀！」。警員在巴士埋站後，會大叫巴士路線編號，然後著在場人士按指示排隊，其間不斷稱「上唔到咁多人，唔好逼、等下架」，不少巴士已載滿乘客，只有空間供數名乘客上車，警員隨即呼籲無法上車人士回到行人路，但後方繼續有人湧前，情況混亂。

▼ 北角站情況 ▼

▼鰂魚涌站情況 ▼

▼調景嶺站情況 ▼