元朗發生驚險「走狗」事件。網上瘋傳片段，可見昨日（20日）早上10時許，一隻柴犬在YOHO MALL對開迥旋處馬路狂奔，有途經車cam拍到牠橫越數條行車線的驚險一刻，男司機驚呼：「嘩，有隻柴犬嘅喂！」女乘客亦驚惶失措稱：「點算呀？點捉呀？佢停喺度呀，你（落車）捉佢吖！」熱心司機隨即停車捉狗，惟柴犬東奔西跳，他亦雞手鴨腳、手足無措，未能將其捉住。

慌亂之際，「主人」現身，一名非華裔女子跑至，柴犬「左閃右避」後，終被該女子捉住抱起，熱心司機則驚魂未定、手掩胸口跑回車上，期間禮貌揚手向後方車輛示歉。該名女子則抱住柴犬沿馬路邊離開，司機駛經時不忙勸喻：「Be careful呀be careful（小心啲呀）。」

片主上載影片時，呼籲「麻煩各位主人叫工人姐姐放狗嘅，記得記得一定要扣好條繩‥‥‥唔好笑我捉狗，因為柴犬真係好惡想咬X我」。

司機的熱心舉動獲網民激讚，紛紛讚揚「樓主好人、好人有好報」、「感謝片主，狗狗受驚容易開口咬保護自己，你已經好叻，起碼幫手阻攔狗狗，讓工人姐姐有時間趕到嚟捉住」。