打鼓嶺坪洋村一間「狗酒店」，昨日（20日）發生女負責人慘被狗隻攻擊致死事故。33歲的黃姓女死者，生前愛心滿滿，不僅創辦多元寵物事業，更積極助養殘疾老狗、推廣寵物急救知識；而她生前最後一篇帖文是本周三（19日），內容是與愛犬共度七夕。

曾與該狗酒店合作的慈善動物保護團體「ARP」（Alliance for Rescues and Preservation），今日在網上發帖悼念姓黃女事主。帖文讚揚姓黃女生前熱心照顧狗狗：「為咗啲毛孩連自己食飯都唔記得」，並將狗隻當作家人，對狗狗相當溫柔。

「ARP」的帖文全文如下：

「我哋嘅好朋友，願你安息

琴日聽到消息，成個腦空白咗好耐，唔敢相信，亦唔想相信。你明明仲係咁熱心、咁有火，為咗啲毛孩連自己食飯都唔記得，點解會係你？

我同你相識以嚟，你從來都唔會吝嗇分享照顧大型犬嘅心得，成日話：「唐狗最識睇人眉頭眼額，你緊張佢仲緊張，所以要慢、要等。」你仲笑住話自己係「狗奴才」，但我知道，你係真心當佢哋係家人。每次見到你蹲低身同隻驚青狗仔平視，輕聲講「冇事冇事」，嗰種溫柔，我永遠都記得。

呢次嘅意外，對我哋成個 ARP 團隊嚟講，唔單止係一單新聞，而係好似切斷咗一條好重要嘅連繫——因為你，就係我哋其中一份子。我哋痛，唔止因為失去一位同業，更因為失去一位笑得最大聲、最肯幫手嘅戰友。

我哋會記住你對世間嘅愛。

一路好走，好朋友。」