電話無晒電點算?奧地利設計減壓「天九牌」 遏止捽Mon癮

撰文:黃正軒
出版:更新:

現代人的確越來越似女性主義學者哈洛威(Donna Haraway)筆下預言那些在20世紀末興起、超越了自然與人造的界線、成份同身份都好複雜的人機合體(Cyborg)存在。
無他嘅,智能電話已經滲入了我們衣食住行、主宰我們的社交娛樂各個生活層面。當周街都係上網低頭族,買嘢畀錢都要支付寶,人機合體不再是《攻殼機動隊》同《鐵甲威龍》等科幻作品描述的遙遠未來,而是近在咫尺之當下。
部機永不離手,其重要性同腦心肝脾肺胃腎等臟腑器官,真心有咩分別?我們都是改造人,如此肉體跟機械電子儀器不分的後現代主義社會,係盛世定衰世都屬未知之數。

奧地利設計師Klemens Schillinger發明的「Substitute Phones」外觀跟天九用的文武牌有點相似。五款假電話可模擬不同掃Mon動作。(Klemens Schillinger)
+2

好多人無咗部智能電話等於無咗條命。因為大家都太過習慣以通訊程式短訊聯絡、在Facebook Instagram社交平台和討論區呃Like看KOL對罵食花生、打機(或觀賞直播打機)、睇片、睇市況炒股票同聽新聞。這些需要就如同陽光、水和空氣一樣,存在就是合理,不存在便會成身唔聚財甚至生存唔到。尤其搭車途中,手機無電或無Wifi數據慢,又沒有「尿袋」喺身「補血」,真係不如死咗佢好過。

但其實在巴士地鐵無手提用,可以讀書(雖然我們已經養成鍾意睇片多過睇字的吸收資訊模式)、可以𥄫女𥄫仔八下周圍乘客做緊乜(雖然九成人都係低頭族)、可以「發吽豆」甚至閉目養神恰下,消磨行車時間選項多的是,不一定會悶死。

背面鐵板扮奢華。(Klemens Schillinger)

奧地利設計師Klemens Schillinger就深感現代人的手機上網毒癮僅屬「心癮」,係「人用我又要用、人玩我又要玩」之群體壓力造成,可以透過復康療程去克服甚至徹底戒除治癮。於是,Schillinger就整咗一套五款完全缺乏數碼功能的「Substitute Phones」來遏止「捽Mon」癮,幫人自智能電話引致的資訊爆炸中脫身。

誠如上面圖輯所見,Schillinger這些「代替電話」(或者更直接叫做「義話」)雖然厚度形狀及攞上手的質感都好似一部iPhone,但沒有黑鏡屏幕,更加無可能上網傾電話。本應是玻璃手動觸控屏幕的表面有凹槽,槽中釀入了一排或多排白色大理石圓走珠,驟眼望落去真係好似天九牌的文武子。

用家能用手指掃動順滑的走珠來模擬平日做上百萬次的「解鎖」、「拉落」、「橫掃」和「放大圖片」等等捽Mon動作。其運作機制就像義肢,削減手機的功能至只餘下掃動之動作,就好似啲人咬住支牙籤戒煙一樣。

掃走珠真係戒到上網癮?(Klemens Schillinger)

Schillinger講到滑動走珠可以竭止玩手機慾望、逃離訊息滿瀉凌亂不堪的網絡,更有冷靜情緒、鎮定心神的減壓功用咁把炮,但不知有無吹大?會否被視為指尖陀螺之類的低能智障把托玩具?都真係未知之數(畢竟有無得賣都成問題)。但點都好,各位重度低頭症患者真係要抬返起頭,面對返個現實世界了。