【麥當勞設計災難】如何用一支「薯叉」引起公憤？
撰文：黃立暉
出版：更新：
M記繼數月前為自家奶昔設計了一枝新飲管大獲好評後，不知道是不是設計設上癮，近日竟然又有新作：
Frork，「薯叉」。
簡單講講，M記話知道客人在食漢堡的時候，漢堡內的醬汁肉汁等會從漢堡尾端漏出，一江春水向餐盤流；又知道客人為了食得唔好嘥，喜歡用薯條沾起這些醬汁繼續開懷大吃。M記於是非常體貼地為大家設計了這枝「薯叉」，好讓人優雅地食用。其實它只是一枝可以插3條薯條的叉柄，意思是客人在插入薯條便可以在「手不沾薯條」的情況下沾汁進食。
香港人連咖哩漢堡嘅洶湧都冇驚過，會驚你區區幾滴汁？（網上圖片）
我知你睇完以上文字已經大呻搵笨而且唔小心恥笑了出聲，我亦難以繼續保持冷靜啦。首先，滴汁可能在外國才有較高機會遇到（因為有些漢堡只用餐盒盛載，香港一般都在盒內再有紙包裝），因此親愛的香港人又有幾可會滴汁滴到通處都是？即「屎」是當年M記推出過最經典噁心的咖哩漢堡我們都冇有怕（港人早已習慣不會徒手拿着漢堡，而是非常有儀態地用包裝紙兜着任何漢堡所滴的汁液。）
至少對我們來說，這種需要本質上已經不存在。
第二，撞你個鬼，點汁就點汁啦，食薯條有誰不用手？我當M記是在體貼一群優雅女士不喜把手沾得油淋淋，但卻又竟然要她們親自用左手拿起三條薯條，然後插進右手所持的「薯叉」之內？然後才作優雅狀地以「薯叉」點汁再放入口？這是什麼玩法？我已幻想到坐在身邊的人發出恥笑聲。我寧願用刀叉食提子，畫面可能冇咁滑稽。
其實認真的日本人很久以前已經在電視節目中示範過正確的拿漢堡方法，亦已有很多網友親身示範過，與其治標不如治本，講多無謂，去片啦。
有點期待這「薯叉」推出市面後公眾的反應，我們即管留名跟進。