【Art Vinyl HK】Eric So Chino Lam +30單位籃球藝術玩具展
6月2至3日，「Art Vinyl 第一屆香港藝術玩具展覽」將於荔枝角舉行，有30個全球單位，以Nike籃球為主題搞藝術玩具，同場又有其他搪膠玩具賣，宅民黨找來Eric So及大豆芽水產Chino介紹這展覽。
香港有足夠能力搞藝術玩具展
【Art Vinyl 第一屆香港藝術玩具展覽】Eric So作為今次Art Vinyl的「搞事人」、穿針引線找到Kenny Wong、Unbox、How2Work等30個單位的，他表示：「今次活動希望藝術成份重啲，分成三部份：先睇有單一主題的藝術展，然後到各artist的個人攤位，可跟藝術家本人交流，傾完拎完簽名、最後先到買嘢玩。」
Eric So說，想給全世界看看，香港也能搞到藝術玩具展，不是單純的搪膠抽籤購物活動、不是散貨場：「成班做玩具artist傾咁樣搞個展，可能都傾咗幾年，後來我在逛藝術展時認識的一位朋友，他忽發奇想跟我講：【有時比起拍賣藝術品，你哋班玩具artist作品仲更加有內容，不如一齊搞個展覽？】」Eric這位朋友的公司就開始串聯起整個活動，尋找場地、聯絡各單位，事情就是這樣開始，之後在短短一年內，他們找到港、日、韓、馬來西亞、歐美組藝術人、玩具公司參與，事成！
咁有咩主題？玩關刀籃球！
Eric So也認同，完全天馬行空無主題，無論參展人和參觀者都難以入手，最終Nike basketball支持了今次活動，同時用上籃球做主題。筆者最初也有點擔心這主題，跟搪膠玩具最常見的Hip Hop、街童、Street Fashion等元素太相似，沒看頭、無新意。但大豆芽水產系列設計師Chino Lam給我看了他的未公開作品，憂慮一掃而空。
「我學生時代的街頭籃球，是龍蛇混集之地。這不單是形容詞，班對手真係個個紋晒龍虎鳳，所以我將籃球跟已經被禁的球形象牙雕塑二合一。」細心睇，公仔會單腳穿籃球鞋、單腳「踢」人字拖，這個又是香港人才會get到的集體回憶位，Chino講：「小時候，老豆要我落街買餸，當然是穿拖鞋。經過球場也會技癢，即使踢拖打波會畀人踏腳指，都照樣會偷時間打陣。」不打籃球的Eric So聽罷也覺得背後的故事非常正斗：「我就係想各單位畀呢類有故事嘅作品。」不過他表示，自己的作品仍未完成……別開空窗呀大佬！
睇完藝術展仲有咩搞？
Eric都提過，第二part就是各參長artist的攤位了，沒有主題限制，新作、舊作、參考作品隨你喜歡，但求有個交流場地，當然，也可以賣玩具的，看中那款，可以拿到認購券。玩家玩夠睇夠了，最後才到售價部埋單。
今次參展單位多達30個，筆者請來自己最熟悉的兩位見個面對話。雖然兩位出道時期不一樣，Eric廿年前已開始搞figure，而人稱「肥輝」的Chino Lam，2016年才離開BANDAI Asia獨立發展，卻因為有共同交友圈：本地樂隊LMF，已相識十多年。Chino：「有次上尖沙咀的板仔鋪Phase 0.2玩，見到一位model身型、明星相的人兄在整理展品，後來才得知他是Eric So。」年輕時的Eric，不開聲說話是的確蠻cool的，到後來Chino在LMF的band房終於撩Eric談玩具，慢慢就熟了。
幸運輪大抽獎 取代排長龍
搪膠展，少不了排隊黨，今次Art Vinyl會用兩階段設施，他們已在網上做抽籤（已完畢），各artist不同時段抽出100名幸運兒，再在入場時用$20買張抽籤券，之後在電子售賣機內抽一張籤，比如有10隻海女Molly，100個幸運兒中就會有10分1人抽中認購權，大熱天時不用再排長龍，落選的話也可取得$20現金券買其他玩具，盡量令去令玩家玩得更舒服更公平。