他，平日開工，一輛電單車，兩個外賣袋，他就是別人口中的「外賣仔」。一手交錢，一手交貨，每次交收過程不過兩分鐘，但見盡人情冷暖，送到上門，有些人「埋怨你送得慢」；有些人更乘機揶揄「唔捱得」；有些人則開口埋口都說「辛苦晒，唔該晒」，然後結果都是一樣「一毫子貼士都冇」。

【點擊「全螢幕」觀看影片】

日打兩份工　朝7晚11

剛剛40出頭的外賣仔，化名「阿權」，在一間薄餅公司任職電單車外賣員逾8年，自言見盡人生百態，從外賣盒看世界。

阿權中學畢業後，便從事廚房，由學徒做起，十多年間做過日本菜、西餐、中餐，最近轉到一間學校飯堂，正職朝7晚4工作。本身居住公屋的阿權，便用餘下的夜晚時間，做多一份工，送外賣。平日工作至晚上10時半，才完成當日的工作，假日更動輒工作至晚上11時。「基本上一返到屋企沖完涼就要瞓，每日休息6個鐘，我都唔細（年紀），雖然冇屋企負擔，未結婚，但都要賺多啲，繼續生存」。

人工低？　為何仍要做外賣仔？為三餐，日間廚師工作完成了，晚上又變回外賣仔。外賣員的基本底薪一般只有40至45元。阿權指，這個幾乎連一餐晏晝飯也付不了的工資，背後包含日曬雨淋，冬天時最嚴重，迎臉吹來的風，如每秒針拮的的刺痛全身。「送餐時間又緊逼，送遲幾分鐘都畀人鬧」。

對於外賣員來說，最吸引的是底薪以外，每張外賣單的貼士。每張單，公司閒日會給予3元，假日則有8元，吸引員工上班，還有顧客給予的額外貼士。

公屋vs私人樓　甚麼人最疏爽？一般人以為居住私人樓、居屋，甚至紀律部隊宿舍的人，應該會給予更多貼士。「現象其實幾古怪，例如順天、順利、順安邨（公屋）比較平民如樂華邨，便有貼士」。阿權解釋，居屋那些人正在供樓，不捨得畀貼士的，「如果私人屋苑就更少，面口又差，態度又衰，好似順利紀律部隊那些真係唔會畀貼士，佢哋覺得你送上來係應份」。

最怕是……唐樓客人「唐樓有10層，住天台，就是11層。有次上到8樓，揸住袋嘢上到去，仲喘緊氣，還要串我，後生仔行幾層樓都喘氣」。結果，一上一落來回共16層樓，「一毫子貼士都冇仲要畀人串，感覺真係好差」，阿權心想，「我收你3元，行8層樓還說我不捱得」。

最慘是……有客人蠱蠱惑惑有人不單不給貼士，還存心想欺騙「幾蚊」。「有次張單180多元，然後一大疊零錢拿給你同你講不用找，一攤出來數，根本就不夠，184元，這裡只有180元」。阿權指他蠱蠱惑惑，「左手畀完我，聽到我咁講，右手才再畀4元我，代表他一早知道不夠錢的，之後先給回我4元」。

阿權當時心情有點激動，我說，「你這樣騙我。一張單賺你3元，你騙我4元。即係做完張單仲要蝕1元」。

「唔該晒冇用㗎，畀錢最實際」不要以為做客人「禮多人不怪」，甚麼都是錢字當頭，提到貼士，阿權也變得很現實，「有些人是很熱情上到去不斷說「唔該晒」，「辛苦晒」，但然後就沒有表示，你畀貼士會更加實際」。