【爆職人】缺乏合約和工傷保障 幕後製作人員倡成立工會

幕後製作人員，往往係每場成功表演背後嘅功臣，之但係佢哋嘅辛酸，我哋又知幾多？
作為音響技術人員嘅Jason，喺呢行打滾咗八年有多。佢眼見行頭內各種不公同陋弊，包括缺乏合約、工傷保障；工作不定時影響作息同健康；就連畀人取消工作預約，都只能吞聲忍氣，冇討價還價嘅能力。自言做得有啲灰心嘅佢，希望可以為同行爭取勞工權益，同時成立一個音響技術人員工會，團結番行頭內嘅大家。