【雷神奇俠3 諸神黃昏】雷神進化版登場 Hulk洛基聯手對抗女死神
撰文：許育民
出版：更新：
在美國加州舉行的Comic-Con動漫節上繼續有新片預告登場，今次有漫威超級英雄《雷神奇俠3：諸神黃昏》（Thor: Ragnarok）新預告片。當蜘蛛俠加埋Iron Man有妙不可言的效果後，從第一條預告已知，雷神今集會同變形俠醫大打出手，但原來兩位的交流唔止咁少，新預告上就見到兩位亦敵亦友，仲搵埋細佬洛基聯手救雷神故鄉神域。
一個小型聯盟，今次有變形俠醫、雷神、女武神及洛基。
自己地方自己救
剪了一頭短髮的基斯漢斯禾夫（Chris Hemsworth），在新預告清爽登場，的確係有型得多。上輯預告，佢同麥克韋化奴（Mark Ruffalo）飾演的變形俠醫，兩位舊戰友在鬥獸場大打一場，以為已係高潮位？原來只係引子，新預告一來就講番變形俠醫變番人之後，打趣問雷神場決戰係咪我贏？畫面即刻播出雷神被打到一仆一碌的情況，但仍然口硬否認︰「我好輕鬆咁贏。」當然變形俠醫都有質疑︰「冇理由！」幾句對白，就設定了今集二人亦敵亦友的身份。
新角色Tessa Thompson飾演的女武神，今次都有吃重演出。
今次主線其實講雷神要守護家園神域，由姬蒂班查（Cate Blanchett）飾演的死神海拉已成功侵略聖域界，而下個目標就係雷神故鄉神域。雷神明知唔夠抽，於是要廣召友好相助，不單止有變形俠醫，仲有仲細佬邪神洛基（湯赫度斯頓 飾）。屋企有事，私怨擺埋一邊，片中會見到兩兄弟拎住支死光槍聯手抗敵，去到最後同死神海拉決戰，更與變形俠醫及Tessa Thompson飾演的女武神連成一線，加強戰鬥力。預告片中，仲見到雷神會有進化版，雙眼發光，保證有料到！
洛基都算Marvel世界中數一數二的有型歹角。
雖然姬蒂班查年紀都有咁上下，但一身死神造型依然煞食。