【戰狼II】40億票房仲未計周邊產品 有Tee有Figure內地熱賣中
撰文：許育民
出版：更新：
《戰狼2》票房正向50億邁進，開始愈來愈多研究其成功之道。當電影大賣時，周邊產品都開始熾熱起來，今次深圳之行，就發現戲院附近已經有《戰狼》附屬產品出售，有Tee又有Figure，十足荷里活大片運作模式。看來今次吳京的收益將會以無限伸延，再咁落去，吳京以個人身份上市都仲得！
記者問要238人仔一件Tee太貴吧！是否有簽名？「如果有吳京簽名要過萬啦！」售貨員說。
這隻戰狼Figure，其實來自Mr. Hero玩具系列，一直都有跟不同品牌合作，今次就揀選了《戰狼》。
整個櫥窗都被《戰狼》佔據了，點睇都睇唔出該店本身是賣monchhichi的。
售貨員︰「著出街，10個人10個都望你！」
其實該店舖本身是monchhichi專門店，但為了售賣這個《戰狼》小Figure，特意將整個櫥窗讓出，放上特大版非賣品Figure及大型海報以作招徠，正因此成功吸引記者注意入內查看。事實上關於《戰狼》的產品亦只有Tee及小Figure，據店員講，賣88元（人民幣）的小Figure反應唔錯，推出幾日已賣出幾十隻，至於限量Tee雖然索價238蚊人仔，但都已經賣剩一件，想買多件都冇。
由於《戰狼》Tee只有該店作獨家發售，店員在推銷時更落足嘴頭，「這件Tee保證你穿上街，10個人經過10個人都望你，其他地方買不到啊！」個人都認同穿上這件Tee出街，惹人目光是一定的，不過是發自艷羨還是奇異呢，就作別論。
賣得《戰狼》產品，當然要清楚電影劇情，兩位都已看過電影，左邊那位小姐更看了兩次。「很好看，快超過50億了（票房）！」
達9成的售票率，以往只有荷里活大片才做到。
140人仔張飛照爆！
電影上畫兩周，票房不斷上揚，有指因為電影加了大量3D版及杜比聲效版場次，以增加票房紀錄。觀乎當日賣飛情況，縱使星期五晚的杜比聲效場索價140人民幣，下午5點查看時，已賣出7成。至於普通120人民幣的3D版，就更加去到9成飛，可見熱情沒有被票價所嚇退。不過內地戲院有樣好，下午6點前的場次全數做優惠，一律35蚊人仔就有交易，真係早睇早享受，仲要慳一舊！
同一套戲，同一間戲院，下午1點場次，輕輕鬆鬆35蚊人仔便可埋單，等到6點後就要索價120至140人民幣。至於3D眼鏡，3蚊人仔一副。
嫌3蚊版本太弱雞，有3D眼鏡售賣機，款色眾多，每副30蚊人仔起。
仲附有疑似米奇老鼠款，可惜該3D制式跟香港不同，否則都想買番副返香港，一鏡兩睇。