【陰陽路20周年】《常在你左右》最新預告 人頭唱機阿佘自轟
撰文：許育民
出版：更新：
自公布港產「驚典」作《陰陽路》，今年會推出20周年紀念版《常在你左右》後，大家都極為期待，除了陣容加強咗，整體感覺亦似乎脫離小本製作的宿命，好想做場好戲嚇下大家。最新香港版預告，就透露了少許劇情，仲唔同你客氣，送幾個驚嚇位畀你，一於嚟個下馬威嚇一嚇。
見古仔同阿佘談情說愛就多，一齊提心吊膽都係第一次。
舊班底新隊友
講明20周年版，聲勢一定要有咁上下，新版陪大家上路的陣容有古天樂、張智霖、林家棟、蔡卓妍、佘詩曼、雨僑、林雪、羅蘭及苑瓊丹等，新舊卡士雲集。而這個20周年紀念版，更是由古天樂、導演邱禮濤及監製南燕牽頭下開拍，真係攞正金漆招牌Reboot。
家棟在戲中成為Tomb Raider，偷中雨僑對陪葬品龍鳳鈪。
貫徹《陰陽路》的「優良」傳統，都係由幾個故事湊拼成一部電影，然後角色們會互相穿插牽連，亂中有序。今次故事先有張智霖飾演的的士司機，因一次嚴重交通意外軒然大波，導致多人傷亡。故事劇情亦由交通意外衍生出各人物，千絲萬縷的關係。其中林家棟飾演的仵工，偷了跳樓身亡的雨僑之陪葬品龍鳳鈪，繼而發生接二連三的靈異事件，令他變得神不守舍。而張智霖在車禍後入住蔡卓妍開設的度假屋，又遇上一宗又一宗的房客自殺事件，其中就包括林家棟前來的離奇尋死！
唔知以為畀人淋紅油。
呢個人頭唱機，保證人聲像真度高，高音甜、中音準、低音勁！
轉攻萬聖節檔
至於銀幕情侶，飾演恩愛夫妻的古天樂與佘詩曼，亦不斷遇上靈異事件，更驚見一個美少女人頭（Heidi@SuperGirls）在黑膠唱盤上旋轉！預告中未有交代事情發展和關係，不過《陰陽路》鐵膽羅蘭姐就有現身，語重心長地同古天樂講︰「唔好一錯再錯，遲早都會穿煲！」似乎幾件事的源頭又指向古仔。電影竟然唔揀盂蘭節上映，轉攻西洋鬼節，10月26日上映同大家賀下萬聖節。呢個安排有兩個可能，第一對套戲好有信心，足以同《恐懼鬥室之狂魔再現》鬥，大家都係系列級，我第20集，你第7集，牌面都唔輸。至於另一個可能，就係對自己套戲冇信心，擔心會輸俾曾志偉同劉心悠個廣告。
拍《陰陽路》最緊要人多夠熱鬧，有埋林雪同苑瓊丹就差不多喇。
+4