【神秘寶藏】黃子華為張保仔自創台山話 挑戰甄子丹講潮州話？
撰文：許育民
出版：更新：
2014年拍完，曾於香港影視博覽宣在2015年底上畫的《神秘寶藏》，結果冇晒影。事隔兩年，正當大家差啲唔記得套戲時，電影鐵定11月2日正式上畫。
據兩位導演鄭中基同陳嘉上講，搞咁耐因為後期製作需時。日前電影推出首條預告，驟眼睇又覺得效果一般未見精彩，到底呢兩年攤到凍晒，仲要畀TVB套《張保仔》反食頭啖湯，值唔值呢？
難得有黃子華同鄭中基兩大笑匠同場，係滿心期待的。（《神秘寶藏》劇照）
《神秘寶藏》曾經有個先導海報，寫明2015年會上畫。
自宣布鄭中基與陳嘉上會聯手執導，以中國海盜張保仔為故事藍本的穿越喜劇《神秘寶藏》後，都遇上不少風波，先有古天樂因檔期問題突然要易角，由黃子華頂上。然後電影一話開拍，TVB就拎住「張保仔」同「穿越」呢兩大元素，搵嚟洪永城同陳展鵬開套《張保仔》，仲銳意要同步2015年出街。結果有志者事竟成，遲來先上岸的TVB，套劇播出一年有多，正版《神秘寶藏》呢刻先話上，真係吹漲。
講番套電影，戲中每位演員都會分飾兩角，黃子華會飾演張保仔及其後人，而陳法拉就要同時飾演鄭中基女友及黃子華老婆，所以兩位男主角會為爭法拉而大打出手。其中古代的陳法拉，仲會以黑面、刀疤、黃牙醜爆女海盜造型登場。
穿越唔使月光寶盒，呢部時光機都可以幫到手。
呢套《張保仔》當年都係台慶巨獻。
子華在戲中要分飾兩角，分別是張保仔及其後人。
鄭中基的搞笑技倆，由《行運超人》斷蟹到《低俗喜劇》暴龍哥，都永冇失手。今次自導自演，本應由自己做埋主角，但佢份人好均真，認為呢個梟雄角色交畀黃子華演會比他更稱職。一個香港人熟悉的歷史人物，交到子華神手上，到底又會變成點呢？「我呢個張保仔是個非常開心的瘋子，為了自己開心可以盡情地蹧躓身邊嘅人，好有霸氣，而最經常被我虐待的，就係導演鄭中基，我仲要每次搞完佢，都專登問番佢我做得夠唔夠好。」此外，子華更為角色自創一種Free Style的台山話，為張保仔增添幾分喜感。至於見到海盜題材，好自然令人諗起《魔盜王》的尊尼特普，但子華就唔介意大家咁講，亦大可以作比較，呢啲咪就係唔怕貨比貨。
電影花唔少時間做後期特技，大家不妨撳下條預告睇下，畀下意見。（影片截圖）
法拉在戲中會有個惡死海盜造型，大家拭目以待。
+5