【反黑．專訪】宋本中憶《三五成群》28座大王：因為佢要轉做幕後

因被特約演員公司老闆媚姨領養關係，令宋本中早年已展開其電影生涯，做過無數次臨記，直至遇上《三五成群》廿八座大王一角，神仙B一句「俊？邊X度俊呀？」至今依然是個經典。但對宋本中來說，此電影沒有為他帶來更好的際遇，反而愈做愈灰，到最後索性轉戰幕後。

《三五成群》改編自97年的秀茂坪燒屍案，惜當年上畫時並沒有太大回響，直到近年因戲中大王與神仙B的對白而遭網民炒熱。由於成本有限，所以《三》片除了飾演三叔的李健仁以及社工的陳芷菁外，其餘角色均為新人，而宋本中飾演的大王，原先亦只得兩句對白。「因為成班都係新人，所以導演錢昇瑋句句都叫我講，結果成了現在這個模樣。」新人因不懂做戲所以演出自然，變相令在演戲的宋本中十分突兀。「喺其他人眼中，大王只有暴戾，咁到底是否成功呢？同埋，就算紅，都唔係紅大王好戲，而係嗰句『俊？邊X度俊呀？』」《三》片後，搵上門的，全都是古惑仔角色，完全被定形了，就連拍拖，女友屋企人第一句就係『嘩！你咪燒屍果個。』」

唔想再演古感仔，宋本中索性轉行幫爸爸打理茶餐廳生意，後來在爸爸的鼓勵下，開始拍獨立短片，展開其幕後生涯。「有一次幫Soler拍紀錄片，當時佢哋嘅經理人問我做咩唔開間公司，成日租器材，條數計落都唔抵。」06年，宋本中與陳國坤在土瓜灣某工廈租了一單位，並成立了「影視兄弟製作公司」，試過無飯開、試過唔識睇合約被人呃。「06年7．1開公司，16年我哋開《反黑》拍7．1回歸，10年就係咁行出嚟，所以唔好放棄，之所以未做到，唔係你唔得，而係未準備好，當你準備好啲嘢就會嚟。」宋本中的際遇，有如《反黑》主題曲《大丈夫》一樣：「男兒一生要經過世上磨練共多少」。

當人人北上時，宋本中其實早在09年也曾北望神州，奈何「古裝又唔識，歷史又唔識，根本接唔到地氣。」直到陳國坤結婚時，席上認識了應采兒，問他有沒有興趣為樂視的《天才在左瘋子在右》執導，他總算賺了人仔，也摸索到國內的模式，為《反黑》打下了基礎。宋本中與陳國坤感覺要好，當年陳國坤靠《李小龍傳奇》打開了國內市場，也不好好帶挈兄弟？「那時大陸的技巧未發展得好好，小龍日日同啲唔識打啲人打，隻手腫到叮噹咁，我哋兩個SKYPE時喊到收唔到聲……」這些情節，明明是情侶之間才會有，現在由宋本中演繹，其實幾好笑。「而家可以笑得出，當時真係好慘，我捱住間公司，佢就日日俾人打。」對於宋本中，陳國坤上次訪問時用了「天才」去形容；對於陳國坤，宋本中細想了一會，然後吐出「如果佢有乜事，我應該係最快跟住佢走，無咗佢我會崩潰，因為佢一直引領我點做人。」毫不掩飾的「表白」，難怪連陳國坤老婆黃伊汶也會妒忌。