【玩轉極樂園】內地早香港一個月上畫 勁吸人仔破Pixar票房魔咒
撰文：許育民
出版：更新：
Pixar彼思的作品，在香港及台灣等華人地區向來都大受歡迎，但原來過去的作品於內地票房其實表現一般，數據指Pixar打入中國市場差不多20年，票房過億的只有4部，但今次《玩轉極樂園》，不單止上畫一星期就過億，截止今日更去到5.5億人民幣，比起多上畫一星期的《正義聯盟》只相差1億，相信過多幾日，贏埋佢都唔係難事。
電影在內地票房破晒Pixar紀錄，成功找到缺口。（劇照）
睇番資料數據，原來自1996年，《反斗奇兵》成功打入中國戲院上畫以來，彼思動畫的票房表現都非常一般，一直以來都不太理想，如果以過億為基本消費，咁20多年後，彼思在內地有13部作品上畫，當中就只有４部過億，而成績最好的，是挾上集之勢的《海底奇兵２》(內地譯名︰海底總動員2)，上畫一星期就過億，最終以近3億人民幣之勢埋單。
鬼怪題材會否又是電影在內地的賣點呢？（劇照）
相比之下，今次《玩轉極樂園》(內地譯名︰尋夢環遊記)，在沒有續集助燃下，以全新原創之勢開畫即高開，而由上月24日到今日為止，不足兩星期已大收5.5億人民幣，大破彼思在內地的票房紀錄。而且走勢依然勇猛，連續幾日榮登單日票房冠軍，雖然累積方面仍輸俾《正義聯盟》1億之多，但1億咁細數目，應該兩日K.O.。
親人是電影今次最大的賣點。（劇照）
講番今套《玩轉極樂園》，故事講墨西哥的亡靈節，相信大家連有這個節日都未必知，在欠共鳴下，何解又可以大收呢？原來大家都覺得故事夠感人，網民的留言都是說︰「皮克斯（彼思）要你哭，你真的不得不哭」、「淚點找得又狠又準」。事實上，電影開畫都只收數千萬，能夠迅速破億，兼打破彼思在內地票房失利的魔咒，的確是靠口碑。
+3