【澳門國際影展】傳余文樂雙囍臨門 千嬅：唔會呢個時候騷擾人
撰文：許育民
出版：更新：
千嬅知道樂仔結婚都即刻send message恭喜佢，亦好戥佢高興。！（梁碧玲攝）
第二屆《澳門電影展》明星大使之一嘅靚媽楊千嬅，今日就以紅色低胸小V領長裙出場，千嬅表示：「舊年作為閉幕嘉賓參加，而今年係第二年參與，作為宣傳大使真係大開眼界，依家年青一輩多咗好多機會，希望佢哋加油。」
見到千嬅條紅色裙好似鬆鬆地，記者就問佢係咪瘦咗，她表示：「近排瘋癲排演唱會又做gym，有target（磅數）要追但就仲爭少少，仲有啲脂肪喺啲鬼祟位。」
千嬅瘦咗好多，希望佢演唱會之前可以達到佢嘅目標。（梁碧玲攝）
提到《春嬌救志明》喺本年度華語片票房冠軍，千嬅就話呢個係好結局。至於問到余文樂的婚事，原來千嬅唔係透過Instagram得知，係從朋友口中知道，千嬅當時都有即刻send message 畀樂仔，又話恭喜佢同真心戥佢開心！
記者問到千嬅，有傳樂仔今次係咪雙囍臨門，但千嬅就表示唔知情，千嬅：「朋友唔會呢個時候騷擾人，係都等人返嚟先，不過都真心戥佢高興。」