【搶紅】黎明首次執導玩低調 海報主角位拱手相讓張涵予
撰文：許育民
出版：更新：
今時今日黎天王黎明，肯出來唱首歌，講句金句都一定會贏盡掌聲。而前年宣布會首次當電影導演的他，大家都非常期待。電影以黎生最喜歡的紅酒做主題，拍成一部動作喜劇《搶紅》，早於今年5月在內地上畫。
遲遲未有聲氣，以為香港上映無望，殊不知今日寰亞電影公布會在來年1月18日上畫，而首張發布的海報更以張涵予擔正，比例最大。至於我們最愛的黎明，就甘於低調做第二男主角，真係估你唔到。
雖然這張海報在內地上映時都有用到，但作為香港上映的第一宣傳品，證明Leon都係一心想退居幕後。
就咁聽《搶紅》呢個戲名，似乎都未必即刻明想講乜，不過呢個戲名似乎又已經比前名《啥酒神》好一點。戲名中的「紅」，係指紅酒，成套戲係講黎明同張涵予兩兄弟為一支歷史悠久的紅酒打生打死，從預告片可見，真係又炸屋又炸橋，好大陣仗。
內地上畫時，仲有張4人海報，一副法國風情模樣。（網上圖片）
另一內地海報，雖然齊晒3大主角，不過Leon都係靠邊站，好尊重涵予哥。（網上圖片）
Leon自導自演，更找來名模杜鵑做女主角。（《搶紅》劇照）
又其實兩位雖以兄弟相稱，事實上是孤兒院的同伴。張水（張涵予飾）與韋利（黎明飾）自小一起在孤兒院長大，後來韋利被收養到法國生活。多年後，張水突然遠赴法國，找韋利幫他競投一瓶名為「酒神」的紅酒。就在拍賣戰中，出現另一組財大氣粗的煤老闆方長方 （王耀慶飾），一場看似明買明賣的紅酒拍賣戰，卻接二連三發生駭人槍擊事件。同一時間，韋利就被另一冷艷賣家利芳（杜鵑飾）吸引着，但原來色字頭上有把刀，後來韋利更發現方長方與張水之間似乎有着不可告人的秘密，究竟邊個係人邊個係鬼？
無論係預告定電影中，張涵予都戲份十足。（《搶紅》劇照）
杜鵑的冷艷美，真係全國第一。（《搶紅》劇照）