《前任3》收16人仔億力壓《星戰8》 前SJ成員韓庚即時翻生
撰文：鄺鈺瑩
出版：更新：
《前任3》兩位男主角韓庚同鄭愷並非當紅小生，女主角更可以話係素人，如今電影狂收16億，真係飲得杯落。（網上圖片）
內地電影《前任3：再見前任》上映15日大收16億，力壓同期大片如馮小剛的《芳華》、吳君如的《妖鈴鈴》、甚至係《星球大戰：最後絕地武士》。再加上《前任》第一、二集各收1.3億及2.5億人仔，而今集兩位主角韓庚同鄭愷亦非當紅小生，實在好難會估到會咁輕易跑出，而有國內影評人預定《前任3》最終票房能夠超過22億，隨時有機成為內地第4賣座的電影，以其3千萬製作成本來說，真係賺笑到。
有內地觀眾話最好唔好同男／女朋友睇《前任3》。（網上圖片）
《前任3》故事講述相戀多年的孟雲（韓庚）同林佳（于文文）因小事之分手，二人的共同好友余飛（鄭愷）同丁點（曾夢雪）想做和事佬，但能醫不自醫。韓庚想重修舊好之際，但原來已經回不到從前……故事簡單到不得了，但因為你我都總有一個「前度」，所以好易引起共嗚，當中的對白「結果我走了沒有回頭，你也沒有挽留。」、「有些人注定是讓你成長的」更被喻為神級金句，唔少內地觀眾都話睇《前任3》睇到淚流滿面，又紛紛在朋友圈大推，亦有觀眾睇完之後，紛紛向前度表白。
韓庚8年前宣佈退出SJ後隨即回國發展，拍過唔少大片如《羅曼蒂克消亡史》、《建國大業》、甚至係西片《變形金剛4:毀滅紀元》，但並不見得對其人氣有幫助，萬沒想到今次會成功。
電影大收，男主角韓庚亦再次回春，曾經係韓國男團Super Junior成員的他，自離團回國發展後，雖然參與過《致我們終將逝去的青春》、《大話西遊3》，但並未為佢帶來人氣，如今靠《前任3》翻身，相信連佢自己都估唔到。