【棟篤特工.新預告】黃子華扮宅男好難受︰你未型過你唔會明!

撰文:許育民
出版:更新:

由黃子華、佘詩曼主演的狗年賀歲片《棟篤特工》,鐵定2月15日,年三十晚上畫,2月14情人節仲有優先場。今日(14/1)電影推出首條正式預告,除了一貫西裝筆挺的特工造型,子華仲破天荒穿上一個宅男Look,高腰牛仔褲孭背囊,一頭亂髮配霧氣眼鏡,仲要有個的士大哥專用的老套腰包,到底好地地一條型棍,搞咩要糟質自己?

由黃子華和佘詩曼主演的2018賀歲猛片《棟篤特工》,將於2月15日年三十晚隆重獻映。一直以來電影都受網民愛戴,早前更洩出電影片段遭瘋傳。大家咁緊張,都係因為期待,今日電影公司就正式發布最新的官方Trailer。片中子華神飾演的特工原來叫「Mr. Chan」,今次在預告片中釋出多個爆笑造型,但原來部分爆笑造型並非自願,而係俾人整蠱,到底邊個咁有本事,整到子華神?

預告片中,子華仲有個瘋狂博士造型,唔知搞乜。(《棟篤特工》劇照)
睇好喇,唔好笑!C君就因為子華個造型太好笑,被打到飛埋牆。(《棟篤特工》劇照)

原來能夠對付到呢位港版007,就係佘詩曼。事關二人曾經是一對甜蜜戀人,仲去到談婚論嫁階段,但後來遭子華悔婚,於是懷恨在心。在工作上,呢位Madam特別指派子華執行一大堆不可能的任務,仲名正言順講到明:「如果玩你有個限期,我希望係一萬光年!」但其實光年係一個距離嘅天文單位。

二人由戀人變成仇人,不過作為賀歲片,最後一定變番情人啦!(《棟篤特工》劇照)

子華在預告片內除了顯示 Mr. Chan 的特工強項:有腦、有型、睇得、打得、冧女得之外,仲有多個奇幻造型,包括著高腰牛仔褲孭背囊、亂髮配充滿霧氣的眼鏡,兼掛個老套腰袋,引嚟戲中拍檔C君的恥笑,結果C君就被子華一拳打到飛埋牆。另外,子華又有動漫cosplay以及一個笠電子頭罩的造型,當佢戴上連厚眼鏡的頭罩後,雙眼被放大,原來呢個又係阿佘其中一樣重刑伺候,睇嚟子華在戲中都有排受。

唔講你認唔認得到佢係子華。(《棟篤神探》劇照)
為免俾人認出,子華仲要戴個面具周圍走。(《棟篤特工》劇照)