【我的情敵女婿】王菀之扮詭娃貝爾嚇龍婆？ 鬼王雷宇揚現身趕鬼
撰文：許育民
出版：更新：
《我的情敵女婿》今個星期上畫，從電影海報睇，卡士多到不得了。當中就有王菀之同方力申演出，兩位在戲中飾演一對情侶，對演戲有份永恆不滅的熱情，無論甚麼工種，只要關演技事都會俾力參與。
而今次呢份工，就要扮鬼去嚇一班被逼遷的小住戶，不過被嚇的竟然係龍婆羅蘭同鵬哥盧海鵬，結果梗係薑愈老愈辣啦！
一睇造型就知係殭屍先生同詭娃貝爾。（劇照）
王菀之同方力申係導演葉念琛的愛將，有新戲開當然有兩位份。今次兩位在戲中飾演一對愛演戲的情侶，一直想入行做演員，可惜苦無機會，於是無論份工係做神秘顧客，還是扮鬼去收樓，總之有戲可演，兩位都會義無反顧舉手去做，今次就要扮鬼去嚇班老人家，因為幾位係釘子戶，被大業主覺得阻住地球轉，於是要靠嚇趕人走，但好笑在受嚇的是一班猛人！
龍婆咁樣扮相，到底係邊個嚇邊個？（劇照）
好耐冇見的雷宇揚都有登場，一見佢就知有怪事發生。（劇照）
一班老人家分別是羅蘭姐、盧海鵬同Joe Junior，唔好睇幾位係老人家，事實上他們都相當有霸氣，無論係扮相還是語氣，都非常嚇人，結果王菀之同方力申都無功而還，仲反而被幾位老人家嚇番轉頭，最終仲俾鬼王雷宇揚趕走，非常抵死。
雖然係笑片，但製作都非常認真。而拍攝當日正值盂蘭節，不過王菀之同小方都唔介意要扮鬼，而且仲有要吊威也，影片所見，王菀之在雨中拍墮樓戲，相當賣力。所以賀歲片唔一定係柴娃娃就拍完，都可以好認真製作。
三位老人家，可以好親和，又可以好嚇人。（劇照）
王菀之個造型好鬼過癮，恐怖得來幾可愛。（劇照）