【棟篤特工】黃子華假期大殺三方　其餘賀歲片票房加埋都唔夠佢威

《棟篤特工》自開畫以來，一直收到嘅訊息就係兩個字︰「脫毒！」黃子華終於憑呢套戲一洗「票房毒藥」之名，優先場收近300萬，兩日破千萬，四日過2,000萬！
截止昨日（19/2），四日紅假連同年三十晚，《棟篤特工》已大收$2,443萬。好勁，真係好勁，即係有幾勁？可以話你聽，呢個數字相等於將三部主要對手的票房《捉妖記2》、《我的情敵女婿》及《西遊記‧女兒國》嘅總和！強呀！

新春假期結束，相信連日來大家都睇過唔少賀歲片，從票房數字看都可以反映大家嘅選擇。第一位係Marvel的超級英雄電影《黑豹》，大收$3,293萬，雖然比起同類型電影稍遜，但依然有睇頭。不過大家更關心係華語片的戰況，唔使多講，第一位當然係子華神嘅《棟篤特工》，基本上由2月14日優先場開始，已經起勢係咁衝。

相關文章

【棟篤特工】黃子華爆10大製作秘聞 「佘詩曼本來係搵我開劇先」​

【賀歲片】香港《棟篤特工》稱霸 內地《唐人街探案2》直逼胡巴

【棟篤特工．多圖】波多野結衣 AV女神最記得達哥係「香港木村」

截止（19/2），即係四日紅假連同年三十晚的票房，《棟篤特工》已大收$2,443萬。第二同第三位分別係《捉妖記2》（$9,644,147）及《我的情敵女婿》（$9,644,007），相差只有$140，咬得好緊，至於《西遊記‧女兒國》，就以$501萬暫時守尾門。可見《棟篤特工》嘅票房已經大幅拋離對手，至於個幅到有幾大？原來$2,443萬相等於三部主要對手的票房《捉妖記2》、《我的情敵女婿》及《西遊記‧女兒國》總和，仲要有找$14萬，咪話唔得人驚。

雖然假期已完，但賀歲檔應該仲有一、兩個星期玩下，不過睇數字，黃子華已經毫無懸念地成為今年華語賀歲片一哥，係睇下挑唔挑戰到《黑豹》。至於阿二之位，反而仲有得爭下，到底係《捉妖記2》定係《我的情敵女婿》，真係要睇定啲先知。