【復仇者3】超級英雄警告你唔好劇透 否則下場就好似蜘蛛俠
撰文：陳穎思
出版：更新：
等咗咁耐，Marvel十年大作《復仇者聯盟3：無限之戰》（Avengers: Infinity War，下稱《復仇者3》）聽日終於上畫啦！相信各位觀眾都好期待入場欣賞這部電影，但並非每個人都在上畫第一日就可以入戲院睇戲，然而劇透就像流感病菌一樣從四方八面而至，叫人防不勝防輕易中招，所以電影公司好貼心地，找來多位超級英雄拍攝「向劇透說不」（Say No to Spoilers）的短片，警告各位早入場又想劇透的觀眾：爆嘢，衰硬！
這條短片集合「鐵甲奇俠」Robert Downey Jr.、「美國隊長」Chris Evans、「蜘蛛俠」Tom Holland、「星爵」Chris Pratt、「變形俠醫」Mark Ruffalo、「紅女巫」Elizabeth Olsen、「黑豹」Chadwick Boseman及「飛隼」Anthony Mackie等多位超級英雄演員，每一位都對劇透三緘其口，邊耍手擰頭邊答：「我連一句都唔X會講」、「我唔想講你聽喎」、「我唔想答你」等等。一向出名口疏的Tom Holland更被貼上黑色膠紙封嘴。
「鐵甲奇俠」羅拔唐尼被問劇透，佢以強硬的態度回答：「我唔想講你聽喎」！（網上截圖）
如果唔想好似Tom Holland咁被膠紙封嘴，睇完戲千其唔好劇透呀。（網上截圖）
《復仇者3》導演Anthony Russo與Joe Russo日前受訪時亦呼籲所有未入場的觀眾要遠離互聯網「避雷」:「我哋建議大家放棄所有社交媒體、甚至乎直情唔好上網，直至入場睇戲為止。」