【死侍2】Celine Dion深情獻唱主題曲 見死侍怒鬧:走開啦蜘蛛俠

撰文:施玲玲
出版:更新:

可能很多觀眾睇完《復仇者聯盟3:無限之戰》都會好憎Thanos,不過唔好意思接下來大家又會見到佢,在即將上映的《死侍2》中,演員Josh Brolin再做終極大佬「基堡」,而今次Deadpool 除了有X-Force小隊,原來還請了樂壇天后Celine Dion幫手,二人在今日釋出的主題曲MV首次同台,她一邊深情唱歌,一望配合在身旁博命搞怪伴舞的死侍,竟然都冇笑場,果然係天后!

《死侍2》可能不夠《復仇者3》疊馬,但論宣傳手法絕對是有過之而無不及,如果以為死侍已經玩到盡那就太天真了,電影公司今日釋出主題曲MV再次為觀眾帶來驚喜,事關續集不只請到重量級樂壇天后Celine Dion獻唱主題曲,她更大方跟死侍同台一齊拍MV,你冇睇錯,唔係CG,跳緊舞嗰個真係死侍嚟。

《死侍2》仲有唔夠2星期就上映。(劇照)

MV最初只有Celine Dion站在空無一人的大劇院中唱歌,不過約30秒後就開始嚟料,穿插死侍在同一背景的片段,身穿招牌紅黑緊身衣的他隨柔情的歌聲擺出沮喪的表情,之後更穿着高跟靴認真熱舞,雖然睇動作熟練度都知應該不是Ryan Reynolds親自上場,但見到死侍跟Celine Dion同場的畫面依然視覺效果十足,二人懶正經的樣子反而更搞笑。

把口唔收的死侍出得場自然要噏返幾句,Celine Dion一曲唱畢,他站在控制台大讚對方表現精彩,但就要求再拍多次,因為認為她唱得太好,自抽表示《死侍2》不是《鐵達尼號》,不用唱得太好,令天后嬲爆反擊:「這把歌喉怎樣唱都是這麼完美,走開啦,蜘!蛛!俠!」死侍最後仲要「楋翻揸沙」,笑言早知找NSYNC唱。