【母親節】姜皓文拍片念亡母 買親玩具都笑住話︰「破產喇！」
撰文：許育民
出版：更新：
今個星期日（13/5）就係母親節，一年一度買花呀，排隊等位飲茶呢啲指定動作就一定要做啦。不過對於至親已離世的，這日又會有另一番感受。
姜皓文（黑仔），媽媽在他年少時已過身，餘下的回憶不多。今年黑仔便親自拍定條片，回想跟媽媽的點滴，奉勸大家珍惜眼前人。
黑仔（左一）跟擁有馬來西亞血統的媽媽（左二），望落都有幾分相似。（影片截圖）
在片段入面，黑仔回想自己跟媽媽的相處日子，印象中媽媽最愛打麻雀，又不時帶他去街市買餸，不過買餸都係前菜，主菜係順手在回途中，於小士多買玩具。「每一次買完玩具，媽媽都會講一句︰『破產喇！破產喇！』都幾好笑。」
黑仔媽媽在他14歲時已病逝。（影片截圖）
【姜皓文專訪】新戲《翠絲》出盡力演變性人：實有一半人唔鍾意【金像獎2018】姜皓文佩服古天樂有心有力：我覺得自己好皮毛【金像獎評論】姜皓文奉獻半生娛樂觀眾 捱足33年與獎無緣？
另一印象深刻的，是黑仔個妹妹有病要睇醫生，當時正值過農曆新年，街上有人舞獅，黑仔陪媽媽和妹妹睇完醫生後，便一個箭步去睇街上的舞獅，忘記了妹妹的藥還在他袋裡。「媽媽四處找我，當時她好嬲，結果找到我時，便籐條炆豬肉。我記得那次媽媽打得我好恨，我激得媽媽好嬲好嬲。我這個衰仔是抵死的。」
黑仔都會不時去拜祭亡母，還來個「合照」。（影片截圖）
由於黑仔的父母很早便離異，加上隨後母親的離世，幾兄弟妹只好被安排到不同地方生活。雖然如此，但大家感情相當要好，黑仔回想上屆候選金像獎最佳男配角時，細佬妹都在場，但當結果一出，得知哥哥落選後，細佬嬲得要即時離場，以示抗議。「不過今年佢就由頭坐到尾。」當然啦，因為今年到哥哥得獎。其實分享這些回憶，黑仔都是想跟大家說︰「親情的確好可貴，不況就趁母親節，跟你愛的或愛你的人，講聲︰『我愛你！』」
雖然自小在不同地方成長，但幾兄弟妹感情都相當要好。（影片截圖）