【復仇者聯盟3】借用蜘蛛俠情節　美國快餐店Wendy’s改圖串M記

美國快餐店Wendy’s近年因在Twitter串爆網民再成焦點，靠搞笑抵死的留言成功殺出一條血路，大膽又創新的公關手法受到激讚，重新登上流行文化的浪尖。電影《復仇者聯盟3：無限之戰》成為全球熱話，串嘴Wendy’s亦加入戰團，改圖抽Big Mac水之餘還引用戲中蜘蛛仔的對白。
註：內含《復仇者聯盟3》劇透。

美國快餐店Wendy’s一直以自家漢堡使用新鮮牛肉為傲，強調多年來拒絕使用凍肉製作，近年公司的Twitter帳號打造出串嘴形象後，此特色更變成其用來串盡宿敵麥當勞的「日經」老梗，經常掛在嘴邊。

最近電影《復仇者聯盟3：無限之戰》成網絡關鍵字，Wendy’s又再發功，把一張Big Mac的圖加入「化灰」特效，更為它加上對白：「I don’t feel so good.」借電影尾聲Thanos集齊6粒無限寶石後，蜘蛛俠面臨灰飛煙滅倒在鐵甲奇俠懷中的台詞，留言窒麥當勞仍在用急凍肉類，暗指Big Mac才是應該消失的東西，令喊位當堂變成笑位。

不過識睇一定睇留言，有網民即時把Wendy’s的商標key到Thanos身上，獲回應，「我們會集齊那些寶石。」另一位則笑言看來Wendy’s已得到「savage寶石」，意指其留言夠放，亦得到「我哋已keep咗（粒石）一段時間。」

蜘蛛俠化灰一幕近日已成為網絡熱門meme，其實Wendy’s也不是第一間餐廳抽水，另一間美國快餐店Whataburger早幾日已用過同一條橋，不過就沒有那麼進擊，而是用來宣傳期間限定的漢堡，所以亦有網民留言串前者執人口水尾，結果？又畀對方串返轉頭，但睇網民的表現似乎非常享受被窒，看來Wendy’s已成為一大「網絡女帝」，應該有不少M迷想朝聖。

新一代萬能key

蜘蛛俠化灰一幕近日已成為網絡熱門meme，未睇《復仇者聯盟3》都應該見過類似改圖，由最初放在已去世的電影和動畫角色，發展到DC、Windows、One Direction已退團作個人發展的Zayn Malik和NBA球星，甚至連一出糧啲錢就使晒都表現到。