【街頭祖霸王】白髮阿伯球技稱霸街場 艾榮、奧尼爾組耆英籃球隊

撰文:施玲玲
出版:更新:

俗語有云:家有一老,如有一寶。不過當街場有老友記踩場,成班後生仔可能會戰戰兢兢,擔心一不小心變「虐老」,只是如果遇到的是《街頭祖霸王》入面的耆英籃球隊,就更要打足十二分精神,因為阿伯分分鐘好打過你,占士(LeBron James)如果想轉會,可以諗諗喎!

呢隊耆英籃球隊都係由真正的籃球員演出,你認得出他們嗎?(劇照)

《街頭祖霸王》(Uncle Drew)講述街波領隊丁屎傾盡畢生積蓄,為球隊報名參加喺街頭籃球聖地──洛克公園舉行嘅大賽,點知成隊波畀宿敵撬走,獎金夢碎,連條女都畀人撬埋。絕望之際,丁屎竟然遇到傳說中嘅隱世街場巨星祖伯Uncle Drew,仲氹掂佢出山再次披甲。祖伯為咗證明「鋒利過嘅刀,都有再鋒利嘅一日」,特別要求搵返當年嘅隊友拍住上,勢要畀而家班後生睇吓…波,始終係老嘅辣!

大家放心,其實電影中的球王阿伯是虛構角色,而且幾年前已開始稱霸街場,幾對是經驗十足。Uncle Drew最初是百事可樂短片中出現,不要看他成頭白髮兼凸腩,後生時不只是街場巨星,基本功紮實,得分、過人技術比後生仔更多花臣。廣告在2012年推出第一集已經瘋魔全球,系列單計YouTube總點撃率至今已經破億,難怪會吸引《移動迷宮》系列監製馬提保雲(Marty Bowen)將故事改編後搬上大銀幕。

戲中Uncle Drew繼續由NBA勁旅塞爾特人巨星控衛基利艾榮(Kyrie Irving)化老妝演出,連同多位NBA殿堂級人物組隊落場,包括4屆NBA總冠軍「巨無霸」奧尼爾(Shaquille O’Neal)、三分神射手「牙擦蘇」米拿(Reggie Miller)、帝王傳奇前鋒韋伯(Chris Webber)、三屆入樽王尼特羅賓遜(Nate Robinson)及4屆奧運女籃金牌得主萊斯莉(Lisa Leslie),超強NBA班底,連占士見到都會眼紅。再加上剛剛憑《訪‧嚇》勇奪MTV電影大獎「最佳喜劇演出」的路威賀維(Lil Rel Howery),帶領這隊耆英籃球隊,想唔笑都幾難!

+2