【超人特工隊2】千嬅夫婦配音未夠壓場 但呢位前輩一發聲就認得
撰文：許育民
出版：更新：
等足14年，《超人特工隊2》終於登場，單計7月19單日開畫票房已大收481萬，首4日更累積2581萬，破迪士尼•彼思動畫開畫周末票房紀錄！
大部分觀眾都大讚今集好睇，Jack-Jack夠晒搶鏡，講英雄主義內容又夠新鮮，不過就對配音換成楊千嬅加丁子高夫妻檔上陣就有點意見，始終上集係吳鎮宇搭郭藹明，仲有鄭中基、葛民輝、鄭融真係夠晒親切。不過入到場都有驚喜，原來大家最愛的龍婆羅蘭都有份配，一出場就認得。
今集一家人一齊出手，團結就是力量。（劇照）
《超人特工隊2》上畫以來票房大收，首4日更累積2581萬，成功超越當年《反斗奇兵3》創下的2570萬及《怪獸大學》的2578萬紀錄，睇嚟票房會繼續做好。
不過對一眾粉絲來說，美中不足是原版配音演員未能再次上陣，上集的吳鎮宇同郭藹明變成丁子高和楊千嬅，早已成定局，但不少觀眾入場先發現葛民輝配的E夫人，以及鄭融配的柏小麗都換埋人就有點意外，幸好接力配音的都表現出色，網民係覺得丁子高把聲太薄，配唔到超能先生那種大隻佬的厚實，有改善空間。
【超人特工隊2】JackJack 17種超能力大公開 惡魔化影分身樣樣精
E夫人同葛民輝把聲，簡直係聲畫合一。（劇照）
除了E夫人，囡囡柏小麗當年由鄭融配音，今年都缺席。（劇照）
羅蘭姐把聲非常易認，一聽就肯定係佢。（資料圖片）
不過睇到中段，大家又有驚喜，事關在冇預期之下，聽到一把熟悉的聲音，就係我們的「龍婆」羅蘭姐。今次不是配恐怖角色，而是聲演一位支持超級英雄執法的大使，為超級英雄拉票做說客。雖然角色只是一名政客，沒甚麼特別演出，但羅蘭姐一出聲，大家就輕易認得係佢。從戲院觀察所見，聽到呢把聲大家都竊竊私語，應該都係話俾同行聽︰「係羅蘭姐呀！」由於羅蘭姐把聲甚有威嚴，跟政客角色相符，非常匹配。能夠有這位老前輩發聲撐場，的確為套戲加番唔少分。
珠玉在前，千嬅同丁子高的確有壓力。（資料圖片）
+1