過年睇賀歲片是常識吧？除咗入戲院睇新片，各大電視台都會日Loop交Loop過年舊戲，不過其實當中有好幾套並非賀歲檔作品、但大家又會不斷翻睇嘅「偽賀歲片」，仲要大部份都係周星馳嘅戲，以下七套你睇咗幾多次？

睇一百次都覺得好好睇、好好笑，劇情高潮迭起，笑料浪接浪咁嚟，唔止星爺演出精彩，吳孟達、張敏、苑瓊丹、徐錦江、夏萍等配角都好出色，真係經典中嘅經典。

官方全名《九品芝麻官之白面包青天》於1994年3月31日上映，大收3千零18萬，為年度票房第7位。

與《九品芝麻官》並列為過年必睇電影之一，改編自經典民間傳說，將吟詩作對融入對白之中，仲有創意無限嘅武功招式、兵器同毒藥，每一句對白都入晒腦，鞏俐嘅演出更係畫龍點睛。

《唐伯虎點秋香》於1993年7月1日暑假黃金檔期上映，大收4千零10萬成為年度票房之冠。

星爺嘅成名作，亦係佢第一部收過百萬片酬嘅作品，連張敏飾演的「綺夢」及吳孟達飾演的「三叔」亦成為經典角色，由於香港人熱愛在拜年時與親朋戚友開賭局，睇賭片亦成為過年的必備節目，然而大部份都唔係賀歲片。

《賭聖》於1990年8月中上映，食正暑假黃金檔期大收4千132萬，一舉成為年度票房冠軍，值得一題的是，本片編、導是劉鎮偉，但人物故事後來與王晶的《賭神》、《賭俠》系列合流。

雖然第一男主角係劉德華飾演嘅「賭俠」陳刀仔，但「賭聖」星爺同佢算得上係平分秋色，兩個拍埋一齊火花十足。另外不得不配服當年王晶編、導賭戲嘅功力，可以講係拍出香港獨有嘅賭片電影宇宙。

《賭俠》於1990年聖誕正日上映，收4千零34萬，為年度票房亞軍，僅僅輸俾《賭聖》，值得一提的是，1989年上映嘅《賭神》都係12月上映，加埋《賭聖》，三套都唔係賀歲片。

整個系列中，只有第3集《逃學威龍3之龍過雞年》是賀歲片，但最經典的第一集於1991年暑假檔上映，都係有張敏同吳孟達等固定班底，雖然臥底題材並非新橋段，但融入校園元素就夠新鮮感，難怪大受歡迎。

《逃學威龍》當年大收4380萬，成為年度票房冠軍，之後連續兩年推出兩套續集，同樣大受歡迎。

過年有賀歲盃睇，但呢套足球電影就唔係賀歲片，星爺自編、自導、自演，將大纜都扯唔埋嘅少林功夫同足球，好完美咁結合，呢啲咪就係創意囉！同其他星爺嘅作品一樣，幾位配角成功跑出，包括「六師弟」林子聰、「四師兄」陳國坤及「醬爆」何文輝等。

《少林足球》於2001年7月暑假黃金檔上映，票房高達6千零74萬，又係年度票房冠軍！

過年最好飲飲食食，有「爆漿瀨尿牛丸」同「黯然銷魂飯」嘅《食神》，擺明一副賀歲片嘅格局。雖然用飲食嚟包裝，查實係王子復仇記式嘅劇情片，故事峰迴路轉、笑中帶淚，一個字「掂」！

《食神》喺1996年聖誕檔期上映，跨埋年大收4千零86萬，成為1997年票房亞軍，就係輸俾同年嘅賀歲片、成龍主演嘅《一個好人》。