電影《尋秦記》上映已經一個月，票房亦達至8000萬，不過身為總監製及主角的古天樂，依然馬不停蹄做宣傳。日前便去到叱咤903，少爺占及阿奴主持的《聖艾粒LaLaLaLa》，被問到今次有不少新加盟的演員，當中咩原因吸引他揀蔡一智演忠臣萬良一角？古生講到其中一個原因原來關頭髮事。

對於揀蔡一智的原因，古天樂首先覺得阿智個樣其實幾古裝。「啲頭髮已經自己搞掂啦，唔使Gel頭，好真嘅一樣。」不過更切合的原因是其特質跟角色相似。「個角色係個好思縮嘅人，佢有呢種感覺。又忠心，好有呢個感覺。」

而向來出名主動出席謝票的古生，問到點樣先可以邀請到他現身？古生就講出一個必勝法︰就係你要識得古媽媽。古天樂︰「嗰日阿媽生日，佢同我講『我有10個朋友包場，你可唔可以10場都同我去謝晒票？』我話︰吓！10……10場？」雖然冇再講下文，但向來孝順的他，應該呢10場都冇走雞。