【踩過界】王浩信讓半臂都贏《賭城》 沒有蔡思貝更理想? 

撰文:
最後更新日期:

點解《踩過界》要畀內地播先?點解要放在星期六、日先播?睇完第一集之後,相信好多觀眾都有這些疑問。王晶的《賭城群英會》逢星期一至五播出,男女主角有馬國明、佘詩曼,仲有Ming Sir、四哥、郭峰等老戲骨,睇牌面當然着數過一星期得兩集的《踩過界》,事實偏偏是《踩過界》口碑遙遙領先,讓半臂都贏過王晶的屎尿屁作品。

王浩信在人群傘海之中,瀟灑穿梭,甚有杜琪峯作品《文雀》的影子。(網上截圖)

三兩下已經出現第一個case,絕對沒有拖泥帶水,節奏明快。(網上截圖)

無可否認,《踩過界》有參考過美劇《夜魔俠》,盲眼律師條橋就肯定走唔甩,但由王浩信孭重飛擔正,又確是恰如其分,型到爆裂,今次他有別於《不懂撒嬌的女人》的深情暖男,而是做一個盲得來相當招積,而且說話亦十分毒舌的文申俠,但他愈Mean觀眾就愈鍾意,尤其是他Mean的對象是經常纏住他的蔡思貝,看到她受虐原來是會大快人心,可能亦是蔡思貝在劇中的最大作用。

蔡思貝飾演灣仔大姐大癲姐,同時亦是王浩信的師爺。

刀疤加哨牙,根本就是《食神》的火雞姐造型。(網上截圖)

講返齣劇一開始畫面已偏向陰沉,王浩信chok住在雨中走過,輕鬆避過身邊的人潮及雨傘,這一幕就有點像杜琪峯電影《文雀》的畫面,全程雖然有點扮嘢,但就正好用畫面帶出了王浩信異於常人的敏銳聽覺,之後已經出現了第一個case,幫另一位盲人打官司,絕對無拖泥帶水,節奏明快,比起《賭城》講足成個禮拜,都還是講緊劇中人物關係,還要大篇幅放在阿叻身上,講他幾咁英明機智,離地得可笑,又要再一次問點解兩齣劇的播放時間不是倒轉呢?

蔡思貝痴戀王浩信,甘願做女兵,其實都幾煩膠。(網上截圖)

王浩信同朱千雪延續《EU超時任務》的戀情?好多人都想囉。

睇過《踩過界》釋出的劇照,看到朱千雪穿上婚紗,跟王浩信成為天造地設一對,難免FF二人延續《EU超時任務》的戀情,Sorry,大家又諗多咗,朱千雪只是客串性質,真正跟王浩信成為一對的是劇中飾演癲姐的蔡思貝,提起她又要講講她的造型,灣仔區大姐大,左邊臉有刀疤,再加上一副哨牙,即時令人聯想到星爺《食神》中,莫文蔚飾演的火雞姐,造型似說話神態亦一模一樣,更難頂是她痴戀王浩信,所以她在劇中亦有另一個身分,律師樓的師爺,順理成章成日會跟住王浩信,但她真的好煩,甚至自願當上王浩信的女兵,送到上門不特止,仲要被王浩信趕走,但她第二日又再黐住對方,週而復始,希望之後她會有少少轉變,否則肯定又被網民批評到體無完膚。

劇中的盲眼律師王浩信擁有超乎尋常的聽覺及嗅覺,其實即是美劇《夜魔俠》。

憑聽覺都知車上有幾多人、什麼樣子,又真係太過誇張。(網上截圖)

比起蔡思貝的硬滑稽,張振朗的出場就自然得多,而且同王浩信產生了搞笑的化學作用,而他的私家偵探角色,在劇中屬於行動組,雖然講到王浩信靚仔又有腦,但始終是盲人,要打交、飛車、槍戰這些粗重功夫,就全部落在張振朗身上。咦,咁咪無得睇王浩信騷肌?大家又唔使失望,他為齣劇操到相當大隻,講到尾咪就係要搵機會派發福利,等女粉絲可以欣賞下他副Body,至於幾時有得睇,就要慢慢追落去啦。

張振朗飾演的私家偵探,搞笑作用比起蔡思貝更加強。



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。