朱智賢爆龍哥刪剪片段Big Big Channel復活 同鬼對打有得睇
撰文：何志衡
出版：更新：
《Big Boys歷險記》捧紅咗龍哥，但係又cut走晒佢其餘拍咗嘅片段，當大家都以為TVB唔想再畀龍哥「乾坤一開」嘅時候，節目主持之一嘅朱智賢竟然講咗真相出嚟，原來TVB將刪剪片段留畀Big Big Channel獨家播。
朱智賢開live口快快爆咗龍哥刪剪片段會喺app出現。
身處韓國嘅朱智賢昨日去咗一間香蕉奶概念店，一邊等食一邊透過Big Big Channel開live，講講下有粉絲問佢有冇帶埋龍師傅？佢就答：「冇帶喎龍哥點會俾我帶嚟呀？龍哥我行我素嘛！」跟住就講起《Big Boys歷險記》：「不過我聽聞《Big Boys歷險記》之前電視刪剪咗嘅片段嚟緊喺Big Big Channel大家都可以睇得番嘞！大家可以繼續睇龍哥作法，龍哥ok啦因為都係拍攝咗兩日囉見到佢。」
龍哥日前呻為咗拍《Big Boys歷險記》花咗十幾萬。
朱智賢口中所講拍咗兩日嘅片段，其中一段就係喺交通黑點超渡亡靈喊晒嗰段，另一段就俾TVB刪走咗，係龍哥（杜慶龍）帶主持去到元朗荒廢學校探靈。朱智賢早前接受《香港01》訪問時講述有關片段內容，參觀下課室同四圍環境，然後龍哥feel到有靈體喺附近，於是作法；朱智賢表示龍哥話要「同佢哋打過」然後闔埋雙眼好似打功夫咁，龍哥仲講咗句：「頭先叫你投降又唔投降，而家打輸咗先嚟投降？梗係冇咁着數啦！」
終於水落石出喇！TVB咁做法明顯係見龍哥有話題，於是收埋片段嚟谷Big Big Channel啦！但係TVB行咗咁嘅先例，第時會唔會將啲劇集大結局都擺埋落個app度㗎？咁就煩啦！
龍哥喊晒口出盡力作法，朱智賢、阿Bob等幾位主持都睇到呆晒。