【超時空男臣】徐榮係最強大台勤力王:我應該更加搏命 !

撰文:
最後更新日期:

徐榮在《愛‧回家》飾演馬強,形象忠直住家男人,但在《超時空男臣》就飾演大奸角,睇眼神就知邊張係啦。

「搶打出頭鳥」尤其中國人社會,太表現自己,老闆覺得你功高蓋主,同事又會覺得你想出位而憎你,太低調又驚老闆覺得你沒有利用價值,成為栽員熱門人選,所以一位員工,如果能夠在大機構生存十幾廿年,穩步上揚,老闆、同事又like你,其實是一門高深學問,43歲徐榮可算是這門學問的代表,在無綫工作了18年,由茄哩啡開始,做到有入屋角色,《愛‧回家》的馬強,令一眾師奶都認得,最近《超時空男臣》飾演大奸角卓華亦搶鏡,他說:「我剩係識「dup」低頭做嘢嘅人。」

徐榮現身在大陸拍攝《大帥哥》和張偉健、洪永城、曹永廉、李嘉有不少對手戲。

徐榮無論名字及外型給人感覺像一頭牛,現實中的他亦是,他的故事不熱血、沒有太大轉折、沒有感人位,但好實在,每一間大公司都會他這種人,他說:「我由路人甲乙丙、冇對白喺後面過鏡做起,喺戚其義監製俾好多機會我,其實我唔知點解?以前都會諗,我做親啲角色都唔起眼,唔好講話起眼,直頭都冇人睇到,我都灰心過,都會問自己仲繼唔繼好,尤其見到同期嘅都有啲成績嘅時候,但既然都係到喇,不如認真啲做啦,可能之後有機呢?」徐榮是1999年第13期藝員訓練班,同期是林峯、楊怡、揚明等。

現實中的徐榮亦是好爸爸、好老公,一有時間就陪屋企人。

徐榮愛足球,閒時同一眾演員及幕後踢波,更有TVB重炮之稱,網友亦說他樣子像荷蘭球星尹尼斯杜萊,他說:「我鍾意巴塞恩尼斯達,利物浦就古天奴。」,徐榮愛球星,但他暫時未算星級,他像一個防守中場,不起眼但不可或缺,他說:「我係唔起眼㗎,但如果做到你話嘅不可或缺都好,事實上喺套劇上面,我唔係男臣,但我係大奸角喎,冇我對付佢哋又唔得喎,都真係不可或缺呀。。。其實巴斯基斯、占士米拿都係好波㗎,哈哈。」

《火舞黃沙》徐榮飾演閻國基,之後得到珍姐賞識,開始拍了7年處境劇。

球迷有句「好唔好波有人睇到嘅」,但至少你要有出場機會,徐榮在06年之前,位置介乎執波仔和後備球員之間,間唔中落下場,有沒有人看到他「好波」都成問題,但徐榮沒有多想,繼續低調做人,但原來勤力真的有回報,06年拍完《火舞黃沙》後,即被助理總經理(戲劇製作)曾勵珍賞識,叫他去拍處境劇,徐榮由沒有人識,到開始有人叫得出他劇中角色名字,《同時三分親》裘俊、《畢打自己人包國仁,再到《愛‧回家》馬強,一個又一個入屋角色,令人記得他叫徐榮,他說:「聽人講啲監製、高層除咗睇主角外,會好留意後面嗰啲路人甲演員,我真係唔知,我亦同高層唔熟,都唔知點解阿姐俾機會我,我亦冇問過,但我知道如果真係咁嘅話,咁而家我就應該更加搏命。」

徐榮現身在大陸拍《大帥哥》外景,找他訪問時,他千叮萬矚要寫《超時空男臣》多一點,他說:「其實我冇乜好寫,我好悶㗎,你不如寫多啲套劇啦,嗰三位男臣之後嘅劇情...(下刪200字)。。。.(而家寫劇透冇人睇㗎)哦。係咩.......唔係喎,其實之後我同蕭正楠....(再刪200字)」襟撈囉



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。