【早霸王】網上識女仔打上電台表白 森美驚青問:又未拍過拖?

撰文:
最後更新日期:

今日《早霸王》表白環節又嚟喇!遭遇過連續幾次滑鐵盧之後,森美同小儀都驚驚喇!森美一聽電話就表現得好緊張,兼打定底:「你鍾意嗰個一定有男朋友呀!」喂故事未聽到最後,真係唔知會點呀!

啱啱去完英國充電嘅森美,似乎仲未洗甩之前接電話嘅陰影。

森美同小儀今日喺《早霸王》一到咗「你知道唔知道有人掛住你」環節就即刻緊張起嚟,工作人員接咗男聽眾阿Ray電話入直播室,森美立即打斷佢說話:「唔使諗喇!你鍾意嗰個一定有男朋友呀又係。」聽眾Ray都嚟唔切反應,森美又講:「好簡單,而家啲男仔,如果你鍾意一個人,又唔去表白,又唔做任何事去暗示,去到最後乜嘢都冇做過嘅!咁死嘅機會梗係大好多啦!」

森美講完一大輪,Ray終於有機會講自己點識個女仔,但只係講喺網上討論區識咗兩、三個月,森美又插嘴:「時租女友呀?你咪喎!時租女友俾錢喎同你出街,援交網站呀?」不停逼阿Ray解釋係咩討論區,搞到Ray唔知好嬲定好笑。

今日聽得出連小儀都有少少淆底。

森美可能驚再遇上「奇難雜症」,直接問Ray;「佢係孤單人嚟嘅?」Ray答:係呀係呀。」聽得出森美、小儀鬆一口氣。

阿Ray原來好浪漫,同心上人出過幾次街,第一次就約睇日落,第二次則去南丫島行山,跟住又係睇日落,仲掂過下手仔,女仔仲挨過佢膊頭添;阿Ray更喺送女仔返屋企嘅時候表白過,不過女仔話未拍過拖要時間考慮下,講到呢度森美又開始淆底:「又未拍過拖?幾緊張下喎。」小儀都驚驚地:「應該冇乜問題喇卦,不過女仔第一次。」

森美打定底同表白聽眾講:「你鍾意嗰個一定有男朋友呀!」

跟住打畀女仔阿Dean,原來阿Dean聽緊節目而且似乎對Ray幾有好感,森美問:「咁點呀?接佢入嚟喇喎!」Dean念羞答答咁話:「ok呀!」森美仲未敢相信:「我唔知乜嘢ok吓!」好明顯仲有心理陰影!不過今次真係成功喇!Ray問女方願唔願意做佢女朋友,Dean答咗句好,安樂晒!森美真係鬆一口氣:「講完喇恭喜你哋,bye bye!」似乎最開心嘅唔只係呢對情侶,森美同小儀終於過關喇!

+4
+3
+2


X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。