【任噏亂評】《踩過界》焗擺炮灰檔期　其實呢套劇比更多一線劇好

《踩過界》已經去到結局篇，不過套劇嘅討論程度好明顯無《同盟》咁熱烈，如果講劇情，雖然唔係《同盟》咁要估大佬，不過每一個法律個案都做得好細緻，好少有悶場。講演員，幾位主角的演技亦都唔會輸俾《同盟》，王浩信的演技甚至愈來愈昇華，連做盲人都難佢唔到，爆牙蔡思貝亦一改以往觀眾對她的劣評，張振朗甚至因為呢套劇而在大陸走紅，咁究竟點解《踩過界》好似無乜人講咁呢？

第一個好大嘅原因，係因為放咗係星期六、日播放，稱呼為炮灰檔期。要知道無綫一向做法都係將重點劇集放喺星期一至五度播，之前有一段時間播足一星期七日，結果因為星期六、日的收視過低，間接拖累整套劇的收視，所以放棄這個做法。可能無綫覺得唔甘心放棄周末呢個市場，結果將《踩過界》放喺呢兩日度播，希望吸收埋呢段時間嘅觀眾。結果？未如理想，要知道周末晚上有好多人都可能會出街食飯，睇吓戲唱吓K，總之就比星期一至五更加少留在家中睇電視，咁套劇好自然無咁多人睇，甚至流失埋一班一直在星期一至五追劇的TVB死忠。在《踩過界》播完之後，新一套《雜警奇兵》又有新玩法，只放在星期日播放，絕對係更加勁嘅炮灰檔期。

第二個原因，《踩過界》係同大陸愛奇藝合資製作嘅劇集，係呢個年頭進軍大陸實在無可厚非，得到大陸資金或者可以推動劇集質素。但係為咗討好大陸，竟然比愛奇藝率先播放，搞到香港都未播完其實大陸已經睇完晒，有心嘅觀眾根本可以輕鬆上網睇晒，唔使等到無綫慢慢播，仲要係隔一個星期播。雖然監製話過結局會有所不同，不過係人都知只係一啲無關痛癢嘅小情節，其實真係無乜意慾打開部電視機慢慢睇。

無綫將《踩過界》放喺星期六、日播，有可能是想參照外國劇集的造法，因為外地其實好多時都會一星期播一集兩小時左右的劇集，反應都一樣咁好。不過無綫可能無諗過，你自己做咗咁多年都係星期一至五播放嘅做法，唔係話改變就即刻變到，點都會有個陣痛期喺度。星期一至日播，收視唔好又變，而家星期六日播，反應未如理想又變，咁唔通之後只係星期日播，衰咗又變喇喎？咁樣變嚟變去唔單只令到觀眾唔適應，直頭係玩死咗啲劇集。

其實《踩過界》嘅收視唔差，放喺星期六日播平均都有23點左右，最高有25點，即使《同盟》咁好反應，喺係大結局嗰集嘅綜合收視最高都係得29.8點。喺大陸，網上點擊播放次數更加係超過五億次，仲拎埋「2017金骨朵網絡影視盛典」嘅「年度十大精品網絡劇」，令我有理由相信，如果無綫將呢套劇放返喺平日播，無論收視、回響、討論都一定比而家來得大，甚至可以似係《EU超時空任務》咁成為頒獎禮黑馬，而家要爭獎？難了。