【胡說八道真情假期】姊妹情點止咁表面 胡定欣:我哋從來冇鬧交

撰文:
最後更新日期:

《胡說八道真情假期》剛剛播映到第5集,6位姊妹胡杏兒、胡定欣、胡蓓蔚、姚子羚、李施嬅與黃智雯在節目中繼續帶觀眾又食又玩遊澳洲。剛巧劇集《同盟》中,胡定欣與姚子羚也有一同演出,所以很多網民都覺得她們特別好朋友。而胡定欣就接受了《香港01》的訪問,分享了她與姚子羚第一次見面的回憶。

胡定欣與姚子羚在《同盟》中也有合作。(林迅景攝)

胡定欣說:「我同子羚嘅認識係...我諗叫做真係認識應該係《酒店風雲》。其實我嘅戲份係好少好少,跟住我哋一齊去菲律賓拍外景。咁應該係嗰時開始識,其實冇話好記得識嗰日係點,因為一路都係同事吖嘛!咁嗰個trip應該係特別熟咗嘅。(同房瞓?)唔係,不過係大家都有傾有講,好自然嘅一件事。」

《胡說八道真情假期》中互指最表裡不一的姊妹。(電視截圖)

還記得在早前的一篇姚子羚專訪中,姚子羚就說過:「胡定欣俾我嘅印象就係太過認真!」而胡定欣其實對子羚的初印象就有另一種看法。「子羚吖!我對子羚第一印象?我唔記得喇喎,哈哈哈!可能同大家一樣啦:『一個好柔弱嘅女孩子』。因為嗰時真係冇宜家咁交心。嗰時係比較同事式嘅friend囉!跟住大家先至開始熟絡。我覺得人與人之間好多嘢都係緣份。你『click』(投契)到就自然會做朋友,唔會有咩特別原因,覺得傾得埋。其實人與人之間,你直覺可以交心嘅時候,你就自然會同嗰個人做朋友。」

睇起嚟姚子羚同胡定欣,真係最好朋友。(電視截圖))

「其實我哋6個人性格都唔會100%似。但係大家志趣,或者諗嘢方向,有時嘅做法係一樣,所以我哋做到朋友。但係我哋6個人今時今日嘅感情都要經歷咗好多嘢,先至形成到今日6個人嘅感情,唔係拍出嚟㗎嘛,唔係拍劇吖嘛!你睇呢個節目,首先係冇稿,真係writer開一個題目,我哋就講,係講到佢哋話:『停啦,得喇夠喇!』我哋仲談論緊同一個題材,跟住佢哋見到我哋一啲反應好好,又被迫攞返出嚟拍。即係你要個friendship好厚,你先會講到,同埋有呢啲嘢出嚟!你話係咪特別有一樣嘢『click』到,又冇喎!但就係你互相信任,大家對大家係點,同埋用咩態度。」

平時佢哋都會約埋一齊見面pillow talk。(Instagram圖片)

好姊妹之間的感情是怎樣的呢?或者身為男人的記者不會明白。男人感到壓力不開心時就會叫上兄弟,再拿着啤酒去公園或者海旁吹風。而胡定欣、姚子羚與一班姊妹呢?就選擇一個簡單的方法。「我哋會喺車傾偈傾好耐。呢樣嘢係anytime,隨時都得,係唔使專登約去傾偈。唔一定成班人一齊傾,總之大家需要,咁就anytime搵對方。我哋嘅關係就係會上對方屋企或者用電話去講。」

+14
+13
+12

「我諗傾十幾個鐘宜家就好難,拍劇就會,哈哈!但係你話傾偈傾幾個鐘就一定會啦!即係半夜3點大家個「胡說八道group」仲係會講緊嘢。昨晚凌晨3點唔知做咩,大家又未瞓,一講啲嘢就『吧啦吧啦~』百幾二百個message咁樣,要慢慢追返嚟睇。」好朋友好姊妹其實就該如此,聊天到凌晨也可以。

從微小處都看得出姚子羚和胡定欣會互相扶持。(林迅景攝)

6位姊妹,在鏡頭前似融洽,實際上鏡頭後她們也依舊一樣融洽。「我想講我哋6個人從來冇鬧過交!唔知點解要鬧?可能有時有啲嘢你聽咗會唔舒服,或者有啲意見你唔係好啱心水,但係我哋會同大家say sorry,我哋大家係understand(了解)嘅,所以唔會有積怨,鬧交!可能嗰刻你會唔明我講咩,或者點解佢點解唔係企喺我立場,但係你會知道就係因為佢企喺旁邊,先可以好清楚咁去分析。」

《胡說八道真情假期》入面佢哋會講感情講到喊。

「未必同你諗嘅係同一個方向,可能佢有第二個意見,但係你係明白嘅。大家個presentation或者溝通方法就係,『首先你唔好唔開心先,我同你諗嘅嘢唔一樣,但係呢一個我認為係應該咁咁咁...』呢個就係我哋溝通方法。要維繫一班真正又珍惜嘅朋友嘅方法就係咁樣。我諗可能大家都做同行,其實大家主要都拍劇,除咗豹嫂,大家遇到嘅問題,或者面對嘅嘢都好相近,所以講出嚟嘅事大家都會understand,maybe自己經歷過。所以咪可以分享同幫下一個人囉!」

+5
+4
+3

看完前幾集《胡說八道真情假期》,很多網民也會覺得胡定欣與姚子羚關係比較好。事實上,胡定欣解釋她們6個姊妹其實不如觀眾看的簡單。「我哋6個係一個狀況,就係我哋各自搭每個人都冇問題,每個人對每個人都有唔同嘢。其實我哋各自搓勻撈亂都冇問題,所以大家傾訴嘅嘢都差唔多。我哋6個係喺一個好平均嘅狀態。我想講,我哋呢一份感情唔係大家所想咁薄。可能大家唔知道,淨係覺得我哋喺節目度飲吖!食吖!嘈吖咁,但係呢個節目就係俾大家知道我看過節目,我哋嘅感情有幾深。平時都唔會講到喊,而有一啲題目我哋從來都未傾過,所以一啲心底話就講咗出嚟。」

成班姊妹去旅行係開心嘅!

《胡說八道真情假期》這個節目中,一班姊妹時常在鏡頭前分享了一些個人的經歷。胡定欣在《香港01》訪問中說:「好多都有講,例如我哋嘅感受,或者我哋對一班姊妹嘅睇法,或者大家經歷過嘅唔開心時候,我哋互相幫大家,去一齊渡過嘅時候。」其實除了節目中說過的,公開過的。各人之間也有很多互相幫忙的事。

好多相都見到其他胡說八道會成員。(Instagram圖片)

「其實有好多嘅,我諗你話幫得最多嘅應該係杏兒,或者豹嫂。其實平時我哋6個大家起居飲食都會照顧。如果事業上就係杏兒幫得最多,因為佢喺我咩都未有嘅時候,佢成日喺側邊幫我。嗰時拍時裝版《野蠻奶奶》,佢俾咗好多意見同鼓勵我去爭取機會。例如《舞動奇蹟》佢會push我去爭取,去做就去自己行呢一步。生活上就係豹嫂,因為6個當中佢就最得閒,我哋又住得近,我又一個人住冇飯食。所以好多時佢就會拉埋我同佢同埋豹哥一齊食飯。自己有啲咩心事嘅,佢得閒吖嘛,咪會搵佢傾囉。其實豹嫂係知道我哋最多秘密嘅一個,哈哈。佢就好似一個大家姐咁,同埋佢afford到時間去做我哋嘅聆聽者。」

胡說八道會成員連服飾都會襯埋。(Instagram圖片)



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。