【TVB Secrets】無綫編劇超難入職 過到試用期都冇人工加

撰文:
最後更新日期:

(左二)葉天成是無綫最有保証的編審,除了上年的《城寨英雄》外,現播映的《使徒行者2》亦是他的作品。

劇集好不好看,演員當然重要,但最重要是劇本,劇本當然是編劇的工作,套劇一「膠」或者太爛,網友第一反應「套劇邊個寫㗎?」,編劇其實承受好大的無形壓力。講真惡毒留言個個都寫得,但要成為劇集編劇就不是人人可以,起碼要經過兩輪面試,過足5關先可以入無綫當編劇,而首先無綫要請人你先有機會,阿巢(化名)曾經是無綫劇集組編劇,他大爆行內秘聞說:「通常都係官網招聘,但唔係年年都有,除咗填啲基本嘢,要寫一篇不少於800字的故事,如果ok就再面試啦,亦有啲熟人介紹,但好少囉。」

有份參與劇集的編劇,即使是見習編劇,名字都會印在劇本上。

雖然有很多人說無綫劇集事事旦旦,但請編劇要求絕對不簡單,除了寫800字外,在面試時又要表現到急才創意,阿巢續說:「有兩次面試,形式都係差唔多,有一條情景題,要你續寫個故事,兩題揀一題,我嗰年係其中一條係2個女人喺超市嗌交,之後發生咩事?兩個女人咩背景,為乜嗌交?對白係點?結局係點?有冇驚喜?你有大約45分鐘去寫,跟住要見ACD(Assistant Creative Director ),要自我介紹,當然要funny啲,你當見寫字樓工死硬,但又唔好太出眾,你要好似可造之材,等佢哋發掘咁,就最一流,跟住ACD又要考你情景題,我嗰條係點樣問人借錢?考哂喇,返去等消息,呢個係第一次面試,佢哋見一次foul一批人,之後再second in。」

無綫請編劇原來過幾關,艱難程度拍得住《皇家特工》請人。

有意想入無綫當編劇的,就真係要問自己是不是創意無限,還要短時間就爆發到,阿巢話自己都冇諗過得,有時都要帶點運氣先得,他說:「當第二次面試,應該等個幾月啦,再去電視城second in,先考下你個人書寫能力,嗰次係考俾8至10個生字,好似蟹、老女人、電話、機關槍、紅色......你揀6個,然後串連一個故事出嚟,有大約30分鐘寫,然後再group discuss,幾個組員傾一個吸人年青人嘅故事出嚟,之後就等消息.....真係請你喇,叫creative trainee見習編劇,人工不會超過12000蚊,過咗試用期都係叫creative trainee,表現好出色、老闆又睇你的話,你就升做junior writer,試用期過咗,冇加人工喎。」

王家衞現已成為國際大師,但後生時亦在無綫擔任編劇。

無綫編劇面試,其實難度很高,兩年前都有網友將編劇面試情境寫出來,被總監問寫一套20集愛情長劇,你會點寫?之後再問如果拍一套30集古裝喜劇又點寫?最後就問如果一套温情長劇,突然要埋尾咁又點寫呢?總知淡定、急智好重要,不過阿巢提醒:「太天馬行空,太高登、太cult唔得㗎,始終都係無綫,明㗎啦,有限範圍,佢哋接受到嘅創意就得㗎喇!」



請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Microsoft Edge 或 Safari。為避免使用網頁時發生問題,請確保你的網頁瀏覽器已更新至最新版本。