【溏心風暴3】蔣志光入無綫30年仍然好享受:我冇翻炒自己

撰文:
最後更新日期:

《降魔的》播完,緊接的《溏心風暴3》又有蔣志光,這個萬能老倌,幾乎套套劇集都有份,原來不經不覺在無綫做了30年,上週三(22日)他獲贈30年服務金牌,一向內儉的他亦覺得時間過得太快,他說:「TVB有樣嘢好得意,佢一路運作緊,你每日都拍緊嘢,時間就係咁過咗去,所以有啲同事做咗10年、20年更加唔覺,因為我哋不停咁拍嘢,回頭一望已經30年,之前公司打俾我,叫我今晚嚟出席,我先醒起......」

蔣志光由歌星轉為藝員,他自言沒想到會做了30年。(陳順禎攝)

人生有幾多個10年,更何況是30年,蔣志光原本只想做電視台「過客」,沒想到一做就是30年,他說:「當年我冇再做樂壇,都要揾個地方落腳,最接近嘅地方應該係TVB,但嗰陣真係從零開始,就係咁,都唔知自己點解做咗咁耐?有句說話我哋成日講,千祈唔好話自己喺呢度(TVB)過渡咋,過過下就喺到唔走得。我諗我餘生都喺TVB過喇,哈哈哈!」

《降魔的》和《溏心風暴3》蔣志光都有份演出,戲份亦不少。

蔣志光是不少人心目中的最佳綠葉演員,不論《降魔的》學識淵博的有為,或是《老表,你好hea!》的隱世歌王高音,每一個角色都拿捏準確,但阿蔣表示自己最初十分迷濛,他說:「初入嚟TVB都辛苦,因為呢份係自己完全唔認識嘅工作,我仲記得嗰陣同蘭子、修哥做《點解香港咁過癮》,蘭子成日投訴我,點解佢做乜,我就跟住做乜?當時嘅我因為唔識,只能copy人哋。」蔣志光係唱作人出身,要一個崇尚創作的人做copy cat,當然非常難受。

阿蔣在《降魔的》一人分演四角,他除了大呼過癮,更發覺4個角色都唔同,証明自己沒有hea做。

阿蔣在無綫做了30年,做到時間都忘記,亦即使演員這份工作不是他的首選,但他從來沒有「揸流灘」,在《降魔的》其中一幕,他驗正到自己沒有hea做,他說:「《降魔的》我可以分演四個角色,我好慶幸,因為4個角色都唔同性格,講嘢方式有唔同,証明我冇翻炒到自己,我冇食老本就算,因為如果自己冇突破,你一定會相同,正如我希望即使我著同一款西裝,戴同一款眼鏡,但我要演到唔同嘅律師,我希望每個角色都賦予生命,做演員如果只係重複自己,其實好辛苦,亦對唔住觀眾,自己亦唔享受,如果係咁,不如唔好做,我嘅態度就係咁。」

《老表,你好hea!》高音這個角色令阿蔣再度受關注,令他的名作《相逢何必曾相識》再度翻hit。

阿蔣為人低調,雖則每個角色都用心,但他覺得自己不會再是焦點,觀眾會忘記了他,直至《老表、你好hea!》出現,他說:「咁多年,其實係呢一兩年有突破性發展,我先知原來觀眾冇忘記我,估唔到仲有人鍾意聽我唱歌,我先多返份唱歌嘅工作,我係感受到自己同觀眾近咗,雖然我終極夢想唔係演員(他想當導演)但我而家做嘅係回饋佢哋,既然佢哋睇得起阿蔣,覺得我仲有前進空間,我就唔想令佢地失望。」

+5
+4
+3


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。